Tulun ngawi mositi koilo kokomoi do koligogon Bato Kabang
ABAABAYAN Kopurimanan Bato Kabang nopo nga iso abaabayan ih pinalantoi id pointongkop pogun montok popoingkawas do kopurimanan tulun togumu kikoompitan toruol Bato Kabang, ahal koligogon om waya toruol dilo ih ubaton id lamin pongusapan.
Laang momunso kotongkop toruol dilo okon toiso-iso ahal di asanang katapi nogi atambaan kopotongob nung au punsoon id timpuunon nogi sabap koulalahon miagal moginggat, mangakan pinang, monigup om moginum nosiliu wookon mantad koulalahon poimpasi di wookon tulun.
Monunurat Pulitik Komontirian, Ponombuluian, Koubasanan om Kinoiyonon Posorili Datuk
Amisah Yassin alansan kopio tuh pinanganjuran kumoinsan nogi abaabayan Minggu Kopurimanan Bato Kabang nayatan pogun toun diti, kaanu manahak kopurimanan kumaa tulun ngawi kokomoi kogunoon kopio kapanamangan kolidasan kabang.
Monongkotoluod om mamagatang nogi isio kumaa Bogian Kolidasan Nipon ih solinaid diti toririmo misokodung miampai bogian sikul montok manahak pongubatan kumaa susumikul om toririmo minggisom popoinggumu do kaparagatan papalaku toiko popointutun om laang montok manahak do kotorinaan nipon dou lu noh id bogian labus kakadaian.
“Pokionuon ku nogi kumaa minampayat ngawi om tulun togumu ih nokotindapou baino diti montok maganu kosiwatan umampai tinan id toinsanan kaparagatan ih pohoroon di bogian panganjur doulu noh montok kapaganu do poniisan bato kabang om poingkuro momorisa kabang sondiri om mokiubat bogian nipon,” ka dau.
Noboros di Amisah ahal dilo ontok pinotimpuun do pinonutuban Minggu Kopuriman Bato Kabang Nayatan Pogun Sabah om Borneo Mouth Cancer Awareness Run 2017 id kakadaian Kundasan di kawawagu.
Nokotindapou nogi ih Kumoduwo
Potunud Kolidasan Bogian Nipon Pogun Sabah Dr. Lawrence Mah Hon Kheong, Presiden (Elect) dokutur ngawi Nipon Malaysia Dr. Leong Kei Joe, Boyoon Ponulung Potunud Wanan Bogian Nipon Dr. Zaiton Hj. Tahir om lansano ngawi agensi.
Pinatarang di Amisah do nakapanau noh ponoriukan id Universiti Malaya di Prof. Rosnah Zain ontok toun 1997 ponokotanda do tulun ‘indigenous’ Sabah om Sarawak ih poingguugumu nakakandai bato kabang kalapas bansa India.
“Mantad Malaysian Oral Cancer Database and Tissue Bank System (MOCDTBS) nopo nga, mantad 156 tulun sumakit kes bato kabang, 59.9 paratus minsingubat koulalahon mangakan pinang, 36.1 paratus momungkus om 35.9 paratus mogiginum,” ka dau.
Sinuangan nogi abaabayan dilo miampai mogisusuai kaparagatan pialatan dilo pomorisaan om ponopisan kolidasan, pomorisaan om pongubatan nipon om ponopisan bato kabang.
Nakaharo nogi pomiran kolidasan, nipon om kerjaya, monoluod raha, kaunter mabpanau Tabung Haji, bas panambasaan buuk, pomiran bomba om pulis, imanimanon, pomiran mantad koisaan ‘sukarelawan’ bato Sabah, pokitonan ‘busker’, papalaku om kaparagatan mangakan kouwaan ngawi kinoiyonon aiso kabarai.
Kaparagatan suai nopo nga pialaan mangawarana, pialaan ‘teka selang kata’ om pialaan kuiz ih pinapanau ih nokopogulu ontok 20 November id Dewan Masyarakat Kundasang.
Namot dilo Kumoduwo Potunud Kolidasan Bogian Nipon Pogun Sabah Dr. Lawrence Mah Hon Kheong minoboros do bato kabang nopo nga bato (kanser) koonom poingkakawas id pomogunan om Pogun India nopo nga ponoluod kes poingkakawas.
“Otumbayaan oku do ogumu id pialatan tokou ih kakaal au pinoilo miampai kokomoi kikompitan bato kabang,” ka dau.
Minonongkotoluod nogi isio kuminaa toinsanan di nokoompit id pinanganjuran abaabayan dilo.