’Graduan’ om Profesional’ tomuhok suminuvang PBS
PENAMPANG: Parti Bersatu Sabah (PBS) nokotoimo 70 puu kavavagu kaampai mantad ‘graduan’ om profesional’ tomuhok di tadau Minggu.
Mantad ginumu dino, 34 pinapanau koos toniibo ih ozuvon di Akademi Kopomuu’anan Berstau.
Kumoduvo Polosiden PBS Datuk Seri Dr Maximus Ongkili minoboos do akademi dino kituduvan momohuda tanak ngavi tomuhok, hoohobi tanak ngavi puu PBS, id piipio ahal kaamung no kopomuu’anan pulitik, ponoinaan, kopongindapuan om ahal kikompitan polinta.
Ka disido, akademi dino ahansan kaanu monuhung tinimungan tomuhok popoingkavas do toihahaan om kabaahan dosido di au aanu mantad tinan ponginabasan takavas tuhun ginumuan toi misosondii.
“Mimang izikoi monimban panandasan tuhun togumu do PBS nopo nga parti montok tuhun nohoing. Miampai kinosuvangon zaa tomuhok diti, iho ponokotanda do parti dino kakaal kaanu mamagazat tanak ngavi tomuhok montok mamung do padamaan dagai.
“Kootuson do puu vagu diti mimang mamung dagai nogi ponokotanda do PBS kakal ‘relevan’ om izioho aanangan miampai padamaan dagai,” ka disido.
Tumanud Maximus, haang miaga dino nopo nga kiguno montok popointutun om popointahang do tanak ngavi tomuhok montok hobi kalati ahal ih kikoompitan miampai ahal ngavi tikid timpu ih kopompit do parti pomolinta.
“Sinakagon tomuhok mositi pointahangon doid ahal ih kikoompitan miampai parti momolinta, kivaa kokuatan naku toi kohungguzan.
“Pokionuon dagai izioho montok miapu toihahaan dosido miampai paganakan, tambahut miaga sotampon toi hobi omuhok,” ka disido.
Minoboos isido, iso mantad ahal ih pinointanga ontok koos sohinaid tohu tadau dino nopo nga kohobian PBS sabaagi parti mogikaakavo tinau.
Sabaagi momuu’an vanan, mimang isido PBS ontok timpu tabantahan tuidongon om pogioton miampai lahan tonudo mogisusuvai tinau.
“Otumbazaan zou miampai ‘prinsip’ diti, iho kaanu monuhung monuidong pogun kinangazan tavasi ontok timpu mikot,” ka disido.
Naamot dino, pinosoou di Maximus o tanak ngavi tomuhok hoohobi izioho ih kakaal balajal mooi do au oindamaan umompit miampai pulitik.
“Aiso hasa montok tinimungan tomuhok montok mamung idsuang kagaaan pulitik, nga tonggungan sabaagi susumikul nopo nga montok momogonop tinan miampai toihahaan om kabaahan.
“Kivaa tiizonon om timpu montok pulitik,” ka disido.