Kuminam monuap upisor SPRM, kuli nojiil duwo tadau, danda RM20,000
TAWAU: ‘Gara-gara’ muhang popoidu do tambalut dau, pinongumbalan songulun kuli tulun songkosuaian manahak susuap kumaa upisor Tinimungan Pulis Marin (PPM) nokotorimo kosusaan soira nukum jiil duwo tadau om danda RM20,000 mantad Kuut Sesyen, hiti konihab.
Santos Samsul, 27, pinaratu do ukuman dilo kalapas minangakun kisala id doumbangan Hakim Abu Bakar Manat montok duwo panandasan manahak do tusin ponuapan RM100 om RM300 kuminaa pinoporuput.
Ponuhuan nogi do Kuut ih Santos papanau do ukuman pomoruhangan jiilon solinaid duwo wulan nung au noh kabarai ukuman danda di pinongontok kumaa disio.
Maya goduwo-duwo panandasan dino nokomoi binasa tumanud koobian Seksyen 17 (b) Akta Tinan Monorina Pomunsaan Susuap Malaysia (SPRM 2009 sabap kuminam manahak susuap.
Ontok timpu iso’i, minagau nogi o kuut do kapatantuan montok kopongiduan ‘hak’ tusin tunui sanganu natandasan kiginumu RM300 kumaa porinta tumanud koobian Seksyen 40 Akta SPRM 2009.
Tumanud do kopoilaan kes, nokorikot natandasan dino doid Pangkalan PPM Semporna ontok 22 November pialatan jam 12 tangadau gisom 5.17 sosodopon montok monulung tambalut dau, Alvin Rudi.
Ruminuba ih Santos miampai pinoporuput om minanahak do tusin ponuapan RM100 om RM300 montok kopoiduan di Alvin ih tinaan sabap aiso surat kointutunan tinan.
Ontok tadau suab dilo, pinoporuput minomonsoi ruputan id Upis SPRM Tawau om pinapatahak di Santos om tusin tunui RM300 kuminaa SPRM Tawau montok laang potilombus.
Pangadawaan tinorina di Upisor Mangadawa SPRM Awang Samsul Baharom Bungso om Kumoduwo Mangadawa Tagayo Rustam Sanip, om natandasan au linansanan luyar.