SIP monulung pakaraja
# Elaun tunui RM600 solinaid tolu wulan nung atagakan karaja, papanaon tumimpuun toun tabantalan
KOTA KINABALU: Kiginumu 935 noribu pakaraja id Sabah ih nokorijisto miampai Perkeso obuli monorimo asil ‘interim’ okitonan elaun tunui kiginumu RM600 sombulan id suriba Skim Sistem Insuran Pakarajaan (SIP), sokiro ko atagakan iyolo do pakarajaan tiinu.
Potunud Koisaan Koumoligan Sosial (Perkeso) Sabah Dr Mohd Ali Hindia minoboros do skim ih papanaon tumimpuun kosolimpuunon toun tabantalan dilo patahakon kumaa papaapu montok timpu ‘maksimum’ tolu wulan.
“Perkeso nokotorimo RM122 riong mantad porinta montok papanau do SIP om RM103 riong otorimo di 57,282 tulun ih otorimo monuntut asil dilo id pointongkop Malaysia.
“Id Sabah au tokou papataru do pangagaan songkuro ginumu nokoompit, nga katanud miampai kousinan di poobion, sumodia tokou mantad iso timpu doid iso timpu monulung pakaraja ih natagakan pakarajaan,” ka dau ontok romuto ontok minanahak boboroson kokomoi SIP, hiti konihab.
Ontok timpu iso’i, minoboros Ali do ih maan papanao tumimpuun Januari toun tabantalan nopo nga iso laang koumoligan sosial montok manahak kopongoligan kumaa pakakaraja ih natagakan pakarajaan miampai manahak sakadai kousinan kalapas turu tadau kinapatantuan natagak karaja.
Suai ko ilo ka dau, papaapu nogi onuan do sakadai kapaganu do pakarajaan wagu suai ko popoingkawas do kobulihan pakarajaan diolo maya abaabayan pingludaan om pingludaan vokasional.
Namot dilo, Upisor Monorina SIP Perkeso Malaysia Mohd Arif Aziz minoboros do skim SIP okon ko kakamot kawawagu nga nakapanau noh di lobi 78 pogun miagal Thailand, Vietnam om Jepun.
Ka dau, kadar kapaapuan di koontok id pogun diti nogi nga poinsusuriba id pomogunan ilo nopo nga 0.4 paratus (0.2 paratus touki om 0.2 paratus mantad gaji wulanan pakaraja).
Pogului, lobi 350 tulun kaampai mantad sanganu poniagaan, pakaraja, kosompuruan pakaraja om puru koisaan touki uminampai do ‘taklimat’ kikompitan SIP ih kumoinsan nogi pinaharo id pogun diti.