Apat monginsada norulun nokito natampasi
LABUAN: Apat tulun monginsada ih norulun sabap kinaraagan id enjin bot id kawaigan Pulau Tiga doros hiti nakaanu minanampasi.
Tinimungan mantad Agensi Popogirotkuasa Maritim Malaysia (APMM) hiti minaganu laang pinapanau do karaja mogium om manampasi (SAR) munggui kalapas nokotorimo ruputan id jam 11 kosuabon di tadau Minggu.
Kumoduo Potunud (Operasi) Watas Komander Maritim Nor Bakari Abu Bakar minoboros do kinatagakan kaapat-apat monginsada dilo pinoruput di tambalut munggui nointutunan sabaagi Yunus Ali.
“Poingkuro poh nga, kooyuon daat ih kihakun mononsog bot mimpanau maritim guminuli kawagu doid Jeti APMM Labuan.
“Karaja mogihum bot ih norulun dilo pinotilombus minomoguno do iso kapal mimpanau maritim.
“Bot munggui nakaanu minogihum id koyuon poingabu songowian koinsanai munggui id korikohonon kiikira 15 batu nautika utara Tanjung Kubung hiti,” ka dau pinapatantu do kinantakan hiti konihab.
Minoboros isio do kaapat-apat munggui ih Ali @Charlie M Yusoff, 62, Wilfred Balang Singa, 38, Jamhari Bujang, 54, om Amir Ahmad Astor, 33, nokito kiikira jam 6.50 sosodopon tadau Minggu id koyuon noumolig om nongohuyan.
Minoboros ih Nor Bakari do pinosusui di munggui do luminabus iyolo doid daat montok magapon di tadau Koonom kiikira jam 4.10 sosodopon.
Tumanud dau ontok masaon magapon ontok timpu dongotuong, norulun bot diolo sabap do asapou rasam om agayo umbak.
JKoyuon dilo mononsog diolo pinopolokit jangkar montok mongilag orulun doid tanga daat.
“Nga, tali ih pinongogos id jangkar dino nokomoi noputut om minaganu iyolo kapatantuan montok muli doid Labuan id jam 6 kosuabon tadau Minggu.
“Do naamot id pindalanan muli dilo, enjin bot tigog do naraag om natadon do bot dilo norulun pogului nokito di tinimungan APMM,” ka dau.
Minoboros isio do bot munggui kalapas dilo nowit doid Jeti APMM Labuan. Nga laang montok mamagayat bot dilo notingkau sabap bot dino notorob ontok minamagayat sabap nosuangan waig daat.
“APMM Labuan minaganu kawagatan kokomoi do ahal koumoligan id daat ih kopoompit do magapon bot tokoodo om bot ngawi monginsada.
“Pisokodungan mantad tulun togumu pokilansanan kopio miampai momonsoi koposodiaan di kangaam kopio pogului lumabus doid daat sumusuhut koyuon tawan di au atantu,” ka dau.