Iloon koimaan taraat ‘pedofilia’
# Kakaal kogumuan tulun au karati kokomoi waya do koimaan taraat ‘pedofilia om ‘pornografi’ - Jainab
KOTA KINABALU: Kakaal kiharo kogumuan tulun pogun diti ih au karati toiko au koilo kokomoi do koimaan taraat ‘pedofilia’.
Montiri Kotundaan Mogigion om Ahal Momoguno, Datuk Jainab Ahmad Ayid minoboros do komen mantad tulun ngawi pogun diti kokomoi do koimaan taraat dilo maya do ‘media sosial’ ih muhang manahak do nakasala kosiwatan koduwo manahak do pokitonan diolo maganu agaan kokomoi kes irad dilo.
“Id suang timpu pomogunan aiso piwolitan diti, asaru tokou mambasa ahal ‘pedofilia’ om ‘pornografi’ ih kopohompit do tangaanak ngawi maya do ‘media sosial’.
“Komen-komen ih noilaan mantad tulun ngawi nogi miampai kogumuan diolo haro ih mangatag mooi do danda om ukuman di awagat pongontok kumaa di nakasala.
“Haro nogi ih manahak komen mooi do nakasala dandaan om ukumon suai ko onuan kosiwatan montok sumonong pomusarahan, kosiwatan koduwo om susuai poh.
“Iti manahak pokitonan do tulun ngawi tokou au poh otootopot ngawi koilo onu totootopot koimaan taraat ‘pedofilia’ om ‘pornografi’ om waya ahal dilo,” ka dau ontok pinotimpuun do sominar Panangadan Pedofilia om Pornografi: Oumolig
MYRNA (duwo gibang) om Siti (wanan) songowian tombului tapantang suai ontok pinotimpuun do abaabayan dilo.
NangkuTanak Tokou?, hiti konihab.
Teks pason dau pinababai di Kumoduo Potunud Koupisan Ahal Tondu Sabah Hajah Myrna Jimenez.
Minoboros ih Jainab do onu noopo tuwa pomusarahan ih posuulon do tulun ngawi pogun diti, iyolo mositi do karati do ponguhatan hiti nopo nga munggui dilo nopo nga tangaanak om poposiliu munggui nopo nga tulun nosukod.
“Tangaanak ngawi di au poh karati nuununu nga noguno noh, miganu kosiwatan om nosiliu munggui mantad tulun nosukod.
“Poingkuro nangku nung tangaanak ngawi dilo nopo nga tanak tobpinai tokou, onu poh kagu nung tanak tokou?,” ka dau.
Kipomusarahan isio do sominar ih pinaharo di Koisaan Ikram Malaysia Pogun Sabah dilo koontok kopio.
Alansan nogi isio tuh sominar om abaabayan irad dilo kaanu popotilombus om palaabon kagu doid pointongkop pogun Sabah.
“Mositi papaamung tokou lobi ogumu kagu kaampayatan mooi do toilalaan om piopuan opurokis montok popoingkawas do kopurimanan kokomoi koimaan taraat om panangadan ‘pedofilia’ om ‘pornografi’ kumaa tangaanak ngawi kaanu popointalang kumaa tulun ngawi miampai lobi alaab.
“Tumanud pangaratian ku, ahal diti aiso kapatantuan kumaa ahal tinaru, bansa om agama. Mantad dilo, piopuan opurokis/apandai montok popoingkawas do kopurimanan toinsanan tulun ngawi kokomoi koimaan taraat diti minog kopio parayaton doid pointongkop pogun tuh koyuoyuon kolumaagan kaanu momodimpot,” ka dau. Nokotindapou nogi ih Boyoon Koonduan Koisaan Ikram Malaysia Pogun Sabah Hajah Siti Zainab Abu Bakar.