Mamalan piangaian tinandasan minonipu tombului nadawa kagu id kuut

JOHOR BAHRU: Sanganu komponi mamalan piangaian/ pisasawaan ‘Zurin Jundi’ insan poh kagu nadawa id Kuut Majistret hiti sabap panandasan monipu songulun tombului dau gisom kinorugian RM5,000, Mac nakatalib.

Poingkuro poh nga, Zurina Ahmad Zundi, 34, mangakun au kasala sabap pinanandasan dilo kalapas ino binasa id doumbangan Majistret Majistret Mohd Azlan Shah Mohd Allias.

Tumanud panandasan, dinawa ih Zurina miampai minonombirang di Erhana Nur Asyariqah Saidon, 25, miampai manahak do ‘pakej’ piangaian tomuura ih kalapas dilo miampai kinaraaton dau minokianu munggui pinoposuang do tusin tunui kiginumu RM5,000 doid akaun CIMB sanganu natandasan.

Kasalaan dilo winonsoi dau id iso lamin id Ralan Jasa, 7, Taman Mutiara Rini, Skudai hiti ontok wulan (Mac) nakatalib.

Dinawa ih Zurina tumanud Seksyen 420 Kanun Koinggoritan ih nung katantu do kasalaan obuli ukumon jiil au kolobi 10 toun om pasuton om danda.

Kumoduo Mangadawa Tagayo Muhammad Mohd Nasir minanahak jaminan kiginumu RM6,000 kuminaa natandasan.

Zurina, ih au linansanan luyar, mokianu mooi do ginumu dilo ingkudian miampai alasan wagu poh disio minambarai tusin jaminan montok kes suai om masaon minggisom monok papadagang barangan poniagaan montok manalasai tutang tombului ngawi dau.

Kuut kalapas dilo pinapatatap do jaminan RM5,000 miampai songulun panjamin om 10 Januari tabantalan sabaagi timpu pamaraitan kawagu kes. Ontok 20 Nov nakatalib, Zurina tinandasan minonipu songulun tondu gisom munggui pinapatahak do tusin tunui kiginumu RM8,500 sabaagi baraian poguluonon montok kos kabarai ‘pakej’ pisasawaan dau ih pinaharo ontok 16 September nakatalib.

Zurina poingkuro poh nga mangakun au kasala sabap pinanandasan dilo om nontok jaminan kiginumu RM6,000 miampai songulun panjamin. -Bernama