Projik popoinggazo Hamin Ponguspan Tawau RM223 lizong opongo ontok Mei 2020
TAWAU: Huguan Monunuat Pogun Tan Sri Dr Ali Hamsa koniab pinotimpuun do abaabazan mamabak tana popoinggazo Hamin Pongusapan Tawau kihoogo RM223 lizong, doiti.
Projik popoinggazo kopoompit do panadaan blok hinominon vagu id boogizan bagas tapak poundoongan kulita hamin pongusapan om opongo dati idd suang timpu tohu toun, iho nopo nga ontok Mei 2020.
Projik dino nogi kopoompit do pinomo’uangan 154 katil doid 555 katil id wad ih posodia kivaa, klinik tabaa, panadaan onom dewan pamahapakan, popoinggazo Koupisan Kaagaban om au kopiuman toi moosi-osi (trauma) om pomo’uangan kotoinaan vagu miaga ‘endoskopi suite’, halata MRI om ‘mesin mamogram’.
Projik tagazo boogizan kohidasan dino ih nookunan siibo Abaabazan Malaysia Ko-11 dino nogi popoizon do Unit Balajalan Tuhun Sumakit, panambasaan buuk, kopoihaan toihahaan, hongkod ponoizukan om ‘kualiti’, om auditorium om hinimput sominal ih sanda-daau kaanu poposuvang do 250 om 80 tuhun.
Ali ontok kosoomo do monunuat abal minoboos do projik popoinggazo dino ponokotanda do kahansanan polinta mooi kopomoguno do kotoinaan kopongusapan kohidasan di hobi avasi, ih nogi piahatan hamin pongusapan ‘kluster’ pogun.
Kokomoi kounahan tampat poundoongan kulita, noboos di Ali do boogizan hamin pongusapan om KomontilianKohidasannokopogiboboos no miampai Konsol Kakadazan Tawau om kivaa 440 petak kulita songindoos boogizan hamin pongusapan posodiaon montok momomoguno.
“Montok timpu tanau’, poposodia izikoi do tapak ‘pakir’ mitingkat ih nogonopan nogi miampai kounahan suvai kaamung no restoran,” kavagu dau.
Idsuang ahal dino, tumanud dau kaanu dati Tawau do kotundaan potihombus miampai piipio projik vagu om popoinggazo montok kohumaagan layat.
“Piahatan dino poinggozoon dagai o koikonon klinik pongusapan id Merotai om montok pakakalaja tuhun ginumuan id uvang diti monoodo dati izikoi do kounahan miaga panadaan kuaters,” ka disido.
Poguhui ontok minanaak bobooson, minoboos Ali do Malaysia apatut kivaa koponginvaguan katanud miampai gaab montok momodimpot koikonon pogun kobuu iho nopo nga 20 poinsasavat id pomogunan ontok toun 2050.
“Mositi invaguan tokou om osikap mantad pogun kobuu miaga koponguhanan ‘Strategi Lautan Biru Kebangsaan’ (NBOS) id suang boogizan polinta ih manaak kouhian poinvavasi kumaa pogun om layat,” ka disido om minanamba do kosunizon tavasi ‘ekonomi’ pogun kiguno kozo montok momodimpot gaab dino.
Minoboos Ali do tuhun nogi mositi mogium lahan montok popoingkavas do konuonuan om songovian miampai polinta mongipop do komosikinan.
“Layat mositi koiho songian asil pogun koingkavas om nogi koingkavas nogi pandapatan pogun om kinoingkavasan kosunizon dino mositi hobi akavas mantad kinoingkavasan ‘inflasi’,” ka disido. Bernama