Indonesia papaharo abaabayan do mongilo rayat aiso ‘dokumen’ nogonop
KOTA KINABALU: Papaharo o koporintaan Indonesia do iso abaabayan kopoompit do kooturan pointantu montok mongilo do ginumu rayat diolo ih kiharo id pogun di aiso ‘dokumen’ tinan nogonop.
Kumoduo Boyoon Montiri Sabah, Tan Sri Joseph Pairin Kitingan minoboros do ilo nopo nga pialatan ahal ih kiguno ih pinointarang di Konsul Jeneral Indonesia Akhmad Daya Handasah Irfan montok monulung mongorulan do ahal rayat Indonesia ih aiso surat kointutunan (dokumen) tinan tototopot ontok pinapaharo do kotumbuluian doid upis dau, konihab.
Ka dau, maya abaabaayn dilo nogi, asanang doti o Konsul Indonesia kapaganu do kopoilaan kikompitan kogumuo rayat diolo id pogun diti ih kiharo ‘dokumen’ tototopot toiko sambalik dilo.
“Nokoilo tokou noh do ahal PTI nosiliu ahal di asasaru pogibabarasan om nookunan noh songowian mantad pisuk kaadat-adaton pogun Asia mooi rayat pogun timbang/ doros ih muhang rumikot id pogun diti mositi papatantu diolo tumanud kooturan toiko kaadat-adaton tokou ilo nopo nga miampai poposunud pogulu laid.
“Iti noh kaadat-adaton id Asia, ilo nopo nga iyolo mositi kiharo ‘dokumen’ tototopot om au maya ralan tikus tuh au kobolingkang kumaa rayat suai ih muhang rumikot miampai ralan di tototopot,” ka dau ontok romuto kontok kinotumbuluian tapantang dilo.
Pairin ih nogi Montiri Kotundaan Infrastruktur dilo minoboros do Konsul Indonesia dilo nogi okon ko mogiboboros kokomoi manalasai ahal PTI noopo, nga pinopohompit nogi do karaja popogirot do piromutan koduo-duwo pogun maya do kotorinaan padsakaian sawat.
Ka dau, koporintaan Indonesia papalaab do abaabayan kotorinaan kapal Batik Air miampai poposodia do kopotuludan kotilombus mantad Kota Kinabalu rumikot id Jakarta ih pohoroon intolu sominggu.
“Iti tantu kapamagayat doti do pongintongan tutumombului, kumakap ngawi om papaapu doulu noh idsuang ahal kotundaan koduwo-duwo pogun Asia diti
“Mantad dilo, toinsanan diti osiliu poposindak nunu noopo ahal kaamung noh piromutan pialatan Indonesia om Malaysia doulu noh id pogun diti,” ka dau.
Kawagu dau, nosiliu nogi ahal pogibabarasan nopo nga projik Talun Alun Tagayo Pan Borneo ih opurokis papanaon id pogun diti, kopoompit do mogisusuai watas.
Ka dau, montok popogirot kagu piromutan pialatan goduwo-duwo pogun, kiatag o komontirian dau montok papanau do projik ralan ih popiromut do Sabah om Indonesia maya do piwolitan kaabatan.
“Koilo tokou do id Kalimantan ogumu noh tanom ngawi sawit om iti komoyon do ‘ekonomi’ kaabatan piwolitan Sabah haro doti kotundaan ekonomi ih kopogirot doti do piromutan pialatan goduwo-duwo pogun.
“Sundung pia irad dilo, ilo pamalanan nogi om gisom baino diti kakaal popogulu do projik Pan Borneo ih kopohompit do koinsanai watas id Sabah,” ka dau.
Pogului, suai mantad minogoboboros kokomoi ahal om karaja popogirot do piromutan pialatan goduwo-duwo pogun, kotumbuluian tapantang Konsul Indonesia doid upis Pairin nogi kitujuan montok poposunud do kokomoi kopowolihan kogulian dau doid Indonesia idsuang timpu tosomok diti.