Mongindapu tokoodo, mongingindapu mororobuat mositi katama sumimban: Tajuddin

TAWAU: Tinimungan mongindapu tokoodo om osuhatanan om mongindapu mororobuat labus kakadaian id pogun diti mositi katama sumimban om momusorou id labus kutak montok papadagang asil kakamot kapalabusan dagang suang pogun om sompomogunan.

Kumoduo Montiri Pomutanaman om Pomorunan Asas Tani, Datuk Seri Tajuddin Abdul Rahman minoboros do ontok timpu diti tinimungan dilo kada minsuriba tinan om bulun noh mokimaamaha do dagang asil kakamot kapangalabusan id bogian kampung om watas noopo sabap pomogunan poniagaan baino nakalaab kaamung noh poposodia nogi porinta do mogisusuai ‘platform digital’ ih mositi gunoon rayat montok moniaga.

“Hontolon poniagaan nokosimban noh. Mororobuat, mongindapu tokoodo om mongindapu mororobuat id Tawau diti, kada poirikau papadagang id Tawau noopo katapi ongoi noh padagang ‘produk’ ih haro kamaung noh gsiom doid China, Korea om Asia tengah,” ka dau.

Noboros disio ahal dilo kuminaa monunurat abar hiti kalapas pinotimpuun do abaabayan Tadau Mongindapu Komulakan pinanjur do Koisaan Momukabun Bogian (PPK) Tawau om Kalab Sipoot om Podtuongisan Mogigion Parlimen Tawau hiti, konihab.

Tajuddin idsuang ahal dilo minangatag kumaa Boyoon Komulakan UMNO Tawau Ariffin Kassim mooi momuruan tinimungan ih kopohompit do mongindapu mororobuat om mongindapu tokoodo Tawau montok papalaku om popokito do asil kakamot kapangalabusan (produk) kinoiyonon Tawau doid pogun miagal China, Eropah, Jepun om Asia Tengah.

“Tokou kiharo ogumu ‘produk’ kinoiyonon ih kapaganu pangaramitan tosonong id labus miagal durian ih nosiliu korohian kopio mogigion id China om sabap dilo mositi palaabon tokou dagang ‘produkproduk’ suai,” ka dau ih mokianu nogi Komulakan UMNO id potitikid bogian gumura aparagat moningolig nasib ‘ekonomi’ mogigion labus kakadaian ih momoguno do ponulungan.

Tajuddin idsuang ahal dilo nogi pinoposorou mooi do ‘produk’ ih dagangon koontok kooturan dagang ngawi kaamung noh ahal idsuang om koumoligan ‘produk’.

Namot dilo, muhang nogi ih Tajuddin do PPK id pointongkop pogun monulung popoingkawas korikohonon om katabaian mororobuat montok kalantoi id pantas dagang sompomogunan.

“PPK id pointongkop pogun apatut do miromut osiliu iso winakas ih poposodia do kopomuruanan montok mangakat mororobuat om mongindapu mororobuat mantad moniaga tokoodo kumaa moniaga tagayo,” ka dau om minanamba do obuli porinta manahak sakadapi noopo nga ahal dilo au kapanahak do rati sokiro ko mongindapu sondiri au koilo monorimo ponimbanan.

Id abaabayan dilo kiginumu 193 mongindapu nokotorimo sakadai kousinan mantad Tekun ih kigatang koinsasanai RM1.79 riong.

Minanahak nogi Tinan Pamadagangan Pomutanaman (FAMA) do toluod kigatang RM160,000 kuminaa 10 mongindapu om nogi 20 mongindapu tomulok nokotorimo nogi ‘kiosk’ potitikid iso kigatang RM20,000 id suriba abaabayan ‘Agropreneur Muda’ mantad Tinan Koisaan Momukabun. -Bernama