GUNOO BOROS TINA DO RUMAYOU GAMPAMASI
tayam, ii kowurasan om koinanon o kointutunan nga tinaru nopo, au milo ointutunan do indai noopo moyo wuros om garung toi ko sayau suai ko mantad do boros.
Nung mangakun o tulun Kadazandusun do tinaru yolo Kadazandusun, boros Kadazandusun mositi boroson diolo mooi do ointutunan ngaw i yolodilo tinaru suai do tulun Kadazandusun yolo. Nga solinaid diti okon ko boros tinaru o sorohon do tulun Kadazandusun sabaagi kointutunan tinaru nga poingalib yolo orohian do ointutunan moyo garung om sayau noopo.
Timpu mangaramai tadau kaamatan, garung, sayau om linundus noopo do turos o koliaban diolopopokito om mintong, okon ko mokinongou nunu boros tinaru.
Gunoon diolo boros Malaya (BM) do mongulud do abaabayan tadau kaamatan, om suminding, sumambayang om manaak boboroson kumaa tulun Kadazandusun sondiri kaampai no molohing kusai om molohing tondu, sukodwagu om tangaanak tongokodo ii osompipi daa pointimung id walai panambayangan diolo id labus kakadayan do maso dii.
Nunu ka do topurimanan dilo tinaru suai kokito koulalaho tulun Kadazandusun miagal dilo? Pointantu osidian (feeling strange) om koirak yolo. Waro nogi wookon dilo tinaru suai otogod gunoon do tulun Kadazandusun o boros diolo do lumohou ngaran do Kinorohingan.
Tulun Kadazandusun sondiri o nobungou tu sundung do haro boros sondiri pomolohou Kinorohingan, au diolo gunoon boros dino do momolohou Kinorohingan.
Aiso guno nung simbanan noopo diolo ngaran do Kinorohingan id Buuk panambayangan diolo nung kakaal gunoon diolo boros tinaru suai do mongilo suang Buuk panambayangan, sumambayang, manahak boboroson om suminding mangarayou Kinorohingan id walai panambayangan diolo.
Katagadan dilo tinaru suai do tulun Kadazandusun momoguno boros tinaru suai momolohou Kinorohingan, komoyon ino do monuhu yolo tulun Kadazandusun do momoguno boros tinaru sondiri lumohou Kinorohingan. Nga sundung do miagal di, okon ma ko au nodi kawasa oh tulun Kadazandusun do mongilo boros tinaru suai om ngaran do Kinorohingan id Buuk Kinorohingan ii nokosurat id BM au minog do simbanan toi ko pugason. Tulun Sina om India okon ko miagal tulun Kadazandusun.
Tulun diolo koilo momoguno boros tinaru sondiri miampai koilo moboros boros tinaru suai miagal ko boros English om BM. Nga mogot po tu boros Kadazandusun kakaal poimpasi id pogun diti. Boros Kadazandusun no boros mamamasok sandad id pogun diti ii gunoon doid koponuratan surat naangayan (abar) pogun om posolimboon id radio VFM. Boros Murut, sundung po posolimboon id radio VFM nga aiso po o posuraton id surat abar. Tulun diolo minog do haro kumaraja id tiyonon ponuratan surat abar mooi do karati o mamaambasa do boros Murut posuraton id surat abar. NUNG