12 kampung nahabpazan vaig hizud
# Tuu munggui pinavahiu doid PPS
PENAMPANG: Asam asapou minogompus tuminimpuun tanga sodop Koiso natadon do 12 kampung nokoguhi nalabpazan vaig doiti.
Potunud Tinimungan Gugumaga Tuhun Ginumuan Malaysia (APM) Sabah Ys Kol (PA) Kamal Mokhtar minoboos do boogizan kampung ih nalabpazan vaig kamaung no id Country Shangrila, Kibabaig, Penampang Proper, Nambazan, Pinapah Kondis, Sugud, Maang, Inobong, Kolopis, Tuavon, Kambau, Dungkahang om Kituau.
Ka disido apat lahan tagazo kaamung no Lahan Panglima Banting, Pinapah Kondis, Sugud om Penampang Proper noputu, ingkuo po nga obuli vazaan di padsakazan avagat.
“Hizud ih samakin kopotongob natadon di tuu munggui mantad duvo paganakan pinavahiu doid Hongkod Kopoundahian Naamot (PPS) Hamin ‘Resthouse’ Kotinanan Sipoot Penampang, tuminimpuun jam 8 dongosodop id Minggu nakatahib.
“Puu APM baino masaon monoodo pongintongan potihombus sumusuut gontob vaig Bavang Moyog kivaa id gontob kopotongob miampai basaan 9.51 meter.
“Asil pinomolisaan nokoiho gontob vaig nokoingkavas osikap kozo sumusuut asam au tuminood mantad podi sodop Koiso,” ka disido.
Namot dino, Koupisan Bomba om Mongumohig Malaysia (JBPM) Sabah pinoposoou do tuhun togumu ih kivaa id boogizan ohizudan pokionuon montok tomoimo miingat-ingat om poinsodia miampai onu noopo kaantakan dati hizud.
Pokionuon nogi o mogiigizon montok tumanud do ponuu’an do boogizan monguasa nung suu’on mundahiu doid boogizan hobi oumohig.
Ontok kotuubungai Utusan Borneo koniab, moboboos JBPM minoboos do nokotoimo o boogizan dau do 10 pamahaavan kaagaban kikoompitan hizud id pointongkop Sabah hoohobi id boogizan Penampang.
“Gisom baino diti, monuhung tokou noopo do kopoundahian id Penampang om zotokou kivaa poinsodia montok nuununu kagaaban om pongintongan tosoisid id uvang ih kotoguvang koimaan taraal hizud,” ka disido.
Potunud Meteorologi Sabah Azemi Daud minoboos do asam mantad podi piipio tadau id Sabah nopo nga vaza mantad tompias tongus Kai-Tak ih nokodonto Filipina.
Ka disido tongus (taufan) ih baino diti noihaan kivaa id kavaigan Palawan Filipina iho nopo nga Utara Sabah totopot nopo au kopogovit do ‘fenomena’ asam miampai kotihombus vagu nga tongus dino au dati koikot id doiti.