Abaabayan CSR pouhanon GLC kaanu papagaan kawagatan rayat: Musa
SANDAKAN: Abaabayan Tonggungan Sosial Korporat (CSR) ih papanaon do komponi kikompitan porinta (GLC) kiguno montok monulung porinta papagaan do kawagatan rayat, ka di Boyoon Montiri Sabah Tan Sri Musa Aman.
Sabap dilo, ka dau, pokionuon disio o toinsanan komponi GLC koporintaan pogun Sabah popogulu do koponguhanan CSR tumanud do kamampuan kousinan komponi diolo.
Tumanud dau abaabaayn CSR ih papanaon do GLC diti popoinggumu kagu kopoinsomokan porinta monulung papagaan do kawagatan rayat doulu noh ih okurang kamampuan.
Iti kiguno kopio montok papatantu do aiso tinimungan pokimamaan oiduanan mantad koponguhanan ababayan sakadai ih papanaon do porinta montok kolumaagan rayat miampai au mongiro hinonggo iyolo poingiyon,” ka dau id Abaabayan Kapanahakan Sakadai Kotimpuunon Koposikulan Abaabayan CSR Koperasi Kotundaan Kampung (KPD) hiti, konihab.
Kiginumu 1,800 susumikul Lamin Koundangan Pogun (DUN) Sukau om DUN Bawang Sibuga nokotorimo sakadai kantung sikul om kakamot ponulis maya do abaabaayn CSR KPD dilo.
Nokotindapou nogi id abaabayan dilo Ponorikohon KPD Datuk Saddi Abdul Rahman.
Mantad dilo, Musa ih nogi Montiri Kousinan pogun muhang toinsanan GLC koporintaan pogun papanau do ponorinaan kousinan di opurokis om otopot montok momodimpot do kountungan.
Ka dau kangai-angaian tosonong kousinan komponi GLC diti popomilo doti do rayat kapaganu asil dilo maya koponguhanan abaabayan CSR miampai potilombus om kapaganu lobi ogumu pokimamaan.
Idsuang ahal dilo, pokionuon disio o rayat tuh au oimbayatan miampai parti gugumaga ih baino diti sumuang om lumabus kampung montok kapaganu sokodung rayat ontok pomilian tagayo.
Tumanud dau iyolo diti aiso ‘modul’ togirot montok kapaganu do sokodung rayat nga koilo paparaat om mamatos au otopot noopo.
“Kada poduliono iyolo diti ih ponogi momuruan kitimpu om au nasantaban ginawo ih mindaama miampai aiso pakayaan,” ka Musa.-Bernama