Kopoluyungan Bawang Pampang powolihon
KENINGAU: Powolihondo porinta o kopoluyungan Bawang Pampang doid kopoluyungan timpuuni montok mongilag antakan ongopiang disan tana poingoros lamin mogigion hiti, ka di Kumoduwo Boyoon Montiri Tan Sri Joseph Pairin Kitingan .
Ka dau, kopowolihan kopoluyungan bawang dilo nopo nga ih tosonong kopio om kangaam mooi do obuli mongilag do antakan kaantakan di au osonong kumaa lamin mogigion ih winonsoi poingoros disan bawang.
“Nung pologoson kopoluyungan bawang baino diti tantu noh do kotilombus doti antakan tana ongopiangan gisom ongopiang tana orulun waig id bogian kongoompit o koligogon do mogigion hiti,” ka dau kalapas minoi intong kinobpiangan tana disan Bawang Pampang id Kampung Pampang, hiti di tadau Koiso.
Tumanud disio, liud ih nantakan nopo nga sabap mantad koyuon tawan di au atantu miampai rasan asapou minogompus id watas diti ontok kosuabon tadau Minggu gisom dongosodop.
“Isai-isai poh nga au obuli manamong dilo, obuli tokou noopo momonsoi ponimbanan miampai momoguno do injin montok papawalid do kopoluyungan om papalawos/popotulid do bawang diti,” ka dau.
Pairin ih nogi Montiri Kotundaan Infrastruktur om Puru Parlimen Keningau minoboros do asaasaru noh porinta manahak kopoingatan mooi do mogigion au momonsoilamin id disan bawang sabap tikid timpu antakan lumiud tagayo koluyungan dilo mundadaliu.
Ontok kuminakap ralan Kampung Limbawan ih nopiang nogi sabap nongopiang tana disan Bawang Pampang, pinosunud disio do ralan dilo nintongan noh id timpu nakatalib om haro noh pamalanan porinta kokomoi do ahal dilo.
“Iti kamaung noh koyuon kogunoon, nokorijisto noh toiko amu tiyonon dilo. Nga ilo maan posurato montok kogunoon tulun kampung om paganuan laang tosisikap tumanud koyuon,” ka dau.
Namot dilo, Panakadai Montiri Pomutanaman om Pomorunan Taakanan ih nogi ADUN Liawan Datuk Haji Sairin Karno minoborosa do tulun ngawi hiti au kangaam kopio momonsoi lamin poingoros bawang.
Ka dau, ontok tongus Greg 1996 nosuhu noh porinta tuh au momonsoi lamin id bogian dilo sundung pia poinsuang id garan tana diolo.
“Onu ih wonsoyon tokou baino nga papalawos do bawang diti mooi do au atambaan kagayo ongopiang tana disan bawang. Montok baino diti, masaon tokou momongo karaja papalawos do bawang id Kampung Limbawan mooi do kampung dilo au ontok opiang tana disan bawang,” ka dau.
Alansan kopio isio do tulun ngawi ih nokoompit id kinantakan taraat diti alanut ginawo magandad kagu nga, nosuhu noh di Boyoon Montiri o koupisan disio (Boyoon Montiri) manahak sakadai kumaa diolo ih nokoompit.
Pogului id kapanahakan boboroson dau id iso hotel hiti, Boyoon Pulis Watas Deputi Superintendan Ahmad Jawila minomisunud do gisom baino diti Longkod Upis Pulis Watas nokotorimo noh ruputan mantad limo sanganu lamin ih norulun Bawang Pampang id kinantakan sosodopon tadau Minggu nakatalib.
Ontok timpu iso’i ka dau, laang miingatingat kakaal papanaon gisom koniab sabap do koyuon tawan di au atantu, tumanud doid ruputan Koupisan Meteorologi.
Ka dau toinsanan puru koumoligan om agensi id suriba Tinan Koumoligan Pogun kaamung noh Pulis Diraja Malaysia (PDRM), Koupisan Bomba om Mongumolig Watas, Tinimungan Gugumaga Tulun Ginumuan (APM) om Rela nokosodia noh montok tumoguang nunu noopo kaantakan.
Ontok kinantakan liud di tadau Minggu, aiso kinoligaganan kiniopon pinoruput. Pokionuon ku nogi iyolo ih nokoompit nongoliudan dilo tuh kaanu momonsoi ruputan pulis id Longkod Upis Pulis Watas,” ka dau.
Kumoduo Monunurat Koporintaan Pogun Datuk Joseph Guntavid, upisor ngawi mantad koupisan om agensi porinta hiti nokotindapou nogi id timpu kapanahakan boboroson om kinakapan doid Kg Limbawan, Kg Pampang om Kg Agudon ih nakakandai noindamaan naraag ontok kinantakan dilo.