3,700 susumikul id Parlimen Sepanggar nokotorimo sakadai
KOTA KINABALU: Kiginumu 3,700 susumikul sikul pintangaan om tosuriba mantad 43 sikulan id bogian Parlimen Sepanggar konihab nokotorimo sakadai kotimpuunon koposikulan okitonan kantung sikul om kakamot ponulis.
Puru Parlimen Sepanggar Datuk Jumat Idris minoboros do sakadai maya do abaabayan Gumuli Doid Sikul dilo nopo nga abaabayan tounan parlimen dau montok susumikul ih okurang kamampuan.
“Suai ko monulung papagaan do tonggungan molohing, ilo nogi nopo nga montok monimbar kopokionuon Luguan Montiri Datuk Seri Najib Tun Abdul Razak mooi do toinsanan Puru Parlimen Barisan Nasional (BN) manaan tonggungan sosial om monokodung poimponu Palan Kotundaan Balajaran Malaysia (PPPM) maya Kopohompitan Molohing om Komuniti (PIBK).
“Maya abaabayan diti, Upis Piturubungan Parlimen Sepanggar tumilombus rumomut miampai bogian sikul dino nokomoi montok poposodia do nuludan ngaran susumikul ih obuli monorimo sakadai dilo,” ka dau kuminaa monunurat abar kalapas pinapatahak do toluod kuminaa susumikul id abaabayan dilo, hiti konihab.
Minoboros isio do abaabayan irad dilo ponokotanda do toririmo porinta maganu kawagatan kokomoi kogunoon balajaran, om kaanu nogi monulung tinimungan di okurang kamampuan.
“Suai ko abaabayan diti, nakapanahak noh porinta do mogisusuai sakadai om kounalan kuminaa susumikul, doulu noh id bogian Sepanggar.
Mantad dilo, rayat apatut monongkotoluod om tumilombus manahak sokodung kumaa porinta,” ka dau. -Bernama