Karnival Buadaya ‘Kanou Moginakan’ Ranau pohoroon 22-24 Feb 2018
RANAU: Karnival Budaya ‘Kanou Moginakan’ nayatan watas ih pohoroon doti id tapak tamu bulanan watas diti ontok 22-24 Februari 2018, nopo nga kopomungaranan kawagu abaabayan ‘Sunduan Nunuk Ragang’ ih pohoroon tikid toun id watas dilo.
Abaabayan dilo nopo nga pialatan laang montok monulung popoingkawas do ‘seni budaya’ koubasanan suku tinaru Dusun kumaa tinimungan sinakgon tomulok om tulun ngawi koinsasanai om popogirot do sunduan oupus do ‘Seni Budaya’ id pialatan tulun ngawi songkoiyonon om nogi poposiliu do Karnival Budaya ‘Kanou Moginakan’ sabaagi ‘ikon’ koubasanan id watas Ranau.
Kumoduo Ponorikohon Tinan Koubasanan Pogun Sabah (LKNS), ih nogi Ponorikohon 2, Komiti Induk abaabayan dilo Datuk Haji Jaimin Samitah ontok korumai, alansan kopio do karnival dilo kaanu popogirot pisompuruan id pialatan minampayat ngawi miampai tulun ngawi.
Ka dau, idsuang timpu ih iso’i alansan kopio karnival dilo kaanu popoingkawas konuonuan (ekonomi) pogun Sabah doulu noh watas Ranau miampai korikotan tutumombului labus om suang pogun.
“Abaabayan Karnival ‘Kanou Moginakan’ ih tumimpuun jam 7.00 dongotuong dilo nogi popointanga do tungkusan koubasanan id watas Ranau sabaagi asil kakamot kapalabusan ponombuluian ih popoingkawas ‘ekonomi’ pogun doulu noh pogun Sabah,” ka di Jaimin.
Tumanud dau, lobi soribu tulun doti umampai do karnival dilo kaampai mantad susumikul, koisaan ngawi koubasanan kinoiyonon om mogigion ngawi posorili watas Ranau.
“Kogumuan pokitonan tiinu, nopo nga okitonan do koponguludan mamanau koubasanan id okitonan sayau om tuuniyon koubasanan ih kagayat om noponu kobilangan,” ka dau.
Tumanud dau kagu, LKNS miampai pisokodungan Upis Watas Ranau mogiwowoyo ngawi manganjur do abaabayan dilo.
Ka dau, karnival dilo potimpuunon doti di Montiri Ponombuluian, Koubasanan om Kinoiyonon Posorili ih nogi Puru Lamin Koundangan Pogun (ADUN) N.30 Karanaan, Datuk Seri Panglima Haji Masidi Manjun. Namot dilo Upisor Watas Ranau ih nogi Ponorikohon Songowian Komiti Induk Haji Faimin Kamin mangalap tulun togumu mooi tumindapou umampai om sumaasi do mogisusuai abaabayan ih maan pohoroo solinaid tolu tadau karnival dilo.