Tadau Paganakan Aki Modsuan, Odu Kunsuyah nataandak id Bundu Tuhan
RANAU: Pinanganjuran abaabayan Tadau Paganakan Aki Modsuan om Odu Kunsuyah montok kumoinduo pinaharo id tiyonon timpuuni taki-aki diolo id Bundu Tuhan Ranau di tadau Kaapat nataandak kopio miampai kinorikotan lobi 400 tulun puru paganakan. Mogisusuai abaabayan pinaharo miagal sukaneka, pialaan mangawarana montok tangaanak, om pokitonan kobulihan mamain tuuniyon kinoiyonon miagal bungkau mantad puru paganakan Sinakagon. Abaabayan dilo pinotimpuun di Puru Parlimen P179 Ranau, Datuk Ewon Ebin ih ponogi miontong Sinakagon Modsuan Konsuyah om isio ponogi nopo nga puru paganakan Sinakagon mantad sinakgon Polokon Modsuan. Narayou di Ewon o laang opori di ponorikohon panganjur Soudi Samy Andang songowian miampai komiti dau montok pinapalantoi do pinirubaan paganakan ih kumoinsan nogi pinaharo id Bundu Tuhan dilo. Pogului dilo, Tadau Paganakan Sinakagon Modsuan Konsuyah ih kumoisan nogi pinaharo id Tamparuli id toun nakatalib miampai kinorikotan lobi limo nahatus tulun paganakan. Minanahak boboroson id ramai dilo pokionuon di Ewon mooi do Sinakagon toririmo monokodung abaabayan kapaganakan mooi do kogos kapaganakan diti osiliu lobi osonong om kopongintutun pialatan iso miampai ih suai. Pinoboros ngi dau do tadau paganakan kumointolu ih pohoroon kalapas dilo pohoroon id watas Kota Belud. Kopinamot miampai Tadau Paganakan Sinakagon dilo asaga nogi Ewon montok monuridong Yayasan Modsuan Konsuyah montok monulung puru paganakan Sinakagon mantad kawo balajaran om popoingkawas do konuonuan (ekonomi) Sinakagon Modsuan Konsuyah. Nokotindapou nogi id ramai dilo nga mononontuduk Sinakagon Supain Lakasa, minonimpuun Sinakagon James Gimpas Ghani, monunurat Sinakagon Regina Lajau om Boyoon Ponulung Potunud GSPI Japen Ariffin AM Nordin.