KKTP mongunsub kuntirikto momonsoi lamin obuli asanganu rayat
KOTA KINABALU: Toririmo Komontirian Koporintaan Kinoiyonon om Pomulaminan (KKTP) manahak pongunsuban kumaa kuntirikto toiko popoburu lamin obuli asanganu rayat id pogun diti. Montiri dilo Datuk Hajiji Noor minoboros do laang tolidas dilo kopokito do kotopotan om kotulidon toiso-iso agensi pomulaminan ih nogi minggisom montok monulung rayat kipandapatan osuriba. “Muhang tokou poposoribau do kuntirikto mamaamasok ih okon mokimaamaha do kountungan noopo nga muhang nogi monulung rayat ih aiso lamin toiko okurang kamampuan. “Sokiro ko muhang sumiliu kuntirikto kalantoi, tantu noh do tonggungan sosial korporat (CSR) miagal diti somoonu kiguno kopio papanaon om komontirian kapamagatang kopio nunu noopo karaja tolidas irad diti,” ka disio. Noboros disio ahal dilo ontok minanahak boboroson pinotimpuun do kapamahakan kunsi lamin obuli asangau kawo ‘Custom Design’ id Kampung Indai, hiti konihab. Id timpu iso’i, narayou di Hajiji o laang tosonong Porosiden Koisaan Kikosianan Rayat Sabah (PPRS) Datuk Datu Mohd Fadli Fathullah ih ponogi kuntirikto mamaamasok ih tumilombus momonsoi abaabayan obuli moninganu sundung pia komponi dau sontoun lobi nogi. Ka disio, papadagang lamin kilinaab 720 kaki persegi miampai gatang RM65 noribu dilo nopo nga laang tosonong komponi dilo di au mokimamaha do kountungan noopo. “Ounsikou kopio oku sabap kuntirikto toiko popoburu pomulaminan tokou diti nopo nga tanak tomulok mamamasok ih kotoboi momonsoi lamin miampai au mongiro kountungan. “Mantad dilo, komontirian manahak pongunsuban kumaa komponi diti montok miwoyo monulung papagaan do kawagatan doulu noh kumaa rayat ih aiso pandapatan togumu om muhang kopio do lamin koiso,” ka disio. Namot dilo, minoboros ih Fadli do nopongo noh bogian dau soosomok tolu unit lamin, om turu kagu masaon wonsoyon ih opongo doti kotimpuunon toun tabantalan. Ka dau, iman-imanon abaabayan komponi dau nopo nga miampai monulung rayat ih kipandapatan tokuudi doulu noh tinimungan tomulok. “Oikto ku, kogumuan rayat Sabah kakaal aiso koponorimaan di koula montok mangapalai loan pomulaminan om moniwa lamin noopo. “Om mantad dilo, papaharo tokou do kotorinaan irad diti miampai sokodungon komontirian pomulaminan montok manahak ‘platform’ kumaa tulun togumu om kaanu mamalan ‘ekonomi’ lobi tosonong ontok timpu tabantalan,” ka dau. Nokotindapou nogi id abaabayan dilo Potunud Syarikat Permata Juta Corporation Ten Yoke Keong om Sanganu Lamin Obuli Moninganu Aemme Norakim.