Duwo kusai nontok siam toun, duwo pasut minongorumpak om minoninduol touki
SANDAKAN: Mahkamah Sesyen hiti pinaparatu do ukuman jiil solinaid siam toun om duwo pasut kumaa duwo kusai tulun songkosuaian sabap minongorumpak touki diolo, id toun nakatalib. Hakim Ummu Kalthom Abd Samad pinaparatu do ukuman dilo kuminaa di Mohd Asri Asmara, 21, om Saidin Abdullah, 18, kalapas minangakun iyolo kisala minamalan montok mongorumpak om minoninduol touki diolo id bogian Jambatan 4, Kampung Sim-Sim hiti kiikira jam 11.10 dongotuong ontok 27 Disember di toun nakatalib. Tumanud do kopoilaan kes, pinoporuput minomonsoi ruputan pulis kalapas binobog di songulun kusai au otutunan do naamot id pindalanan muli doid lamin dau. Beg piigitigit kiwarana oitom sanganu dau napanakau noh, kisuang surat pongintutunan tinan, kad bank, kunsi padsakaian om tusin tunui RM2,470. Asil pinonoriukan nokoilo do binobog di Mohd Asri ih pinoporuput minomoguno do sawatang bosi gisom nosindualan id tulu om lunggaian pinoporuput pogului minongorumpak beg piigit-igit. Kosuabon pogului kinantakan, nokoruba ih Saidin miampai Mohd Asri om tabang dau montok tujuan mamalan pongorumpakan dilo. Tusin asil pinongorumpakan kalapas dilo ginuno montok minomoli tolu tinan talipaun piowit-owit. Mohd Asri kalapas dilo nakaanu minamagakom ontok 7 Julai toun diti id bogian Jalan Dua, Bandar Sandakan om ih Saidin tinaan tolu tadau kalapas dilo id tampat karaja dau id Taman Nasalim. Songulun kagu tambalut diolo kakaal poingidu. Sabap kasalaan dilo, goduwo-duwo natandasan dinawa tumanud Seksyen 395 Kanun Koinggoritan ih kopongobi do ukuman jiil soliniad 20 toun om pasut. Pangadawaan kes pinapanau di Kumoduwo Mangadawa Tagayo Mohd Faisal Mohd Noor. Id suang kuut iso/i, songulun kusai tulun Indonesia pinojiil solinaid 18 wulan sabap kiharo apat cop pilasu id pasport sanganu dau. Ali Daud, 43, ih pakaraja id Pahang nokotumboyo kisala om minomisunud do potitikid cop pilasu dilo naanu dau miampai baraian RM600. Mantad apat cop dilo, duwo cop lumabus pilasu pinorikud id mukasurat 13 om 15, om duwo kagu cop pas kakapan pilasu kiharo id mukasurat 15 om 17. Natandasan nataan id kaunter korikotan Tutubpoon Kapal Tumulud Sandakan hiti kiikira jam 9 dongotuong ontok 15 Disember nakatalib. Sabap kasalaan dilo, dinawa Ali tumanud Seksyen 56 (1)(I) Akta Imigresen 1959/63 (Akta 155). Pangadawaan kes pinapanau di Junior Gorbex Singh ih nokotindapou montok koobian Kumoduo Mangadawa Tagayo. Ponuhuan nogi di Ummu Kalthom ih koinsanai natandasan montok pootodon doid Koupisan Imigresen kalapas asalasai pinapanau ukuman.