Moniaga kusai nokito notongob pomuhabaan idsuang kulita
KOTA KINABALU: Songuhun moniaga kusai nokito do nososok pomuhabaan kahapas nokosingud hisun arang ih tinutudan idsuang kulita dau id boogizan pointahun Tisan Daat Tanjung Aru 2 sosodopon tadau Kohimo nakatahib.
Munggui nointutunan sabaagi Liew Ka Ket, 42 kialamat id Luyang Kota Kinabalu.
Huguan Pulis Uvang Kota Kinabalu Asisten Komisioner M Chandra minoboos do kinantakan jam 5.27 sosodopon noihaan di puu pulis ih minonoodo pimpanaan id boogizan dino.
“Songian nopo pinolisa puu pulis nokoiho do munggui idsuang koozuvon au kopiuman tinan id suvang kulita dau ih kihisun.
“Puu pulis dino nokomoi igkuo po nga au nakaanu minongukab hongobon kulita munggui poguhui nakapaganu sakadai mantad boogizan Koupisan Bomba om Mongumohig Malaysia (JBPM),” ka disido.
Minoboos isido do noihaan do boogizan dau do natadon hisun nopo nga mantad arang ih tinutudan idsuang bagas pamanggangan songian hongobon tiguhu ponong gibang binabak.
“Asil pinomolisaan potihombus nokoiho do aiso kinosinduahan toi vaza nokohonit om nogonitan id tinan munggui.
“Munggui kahapas dino pinaatod doid hamin pongusapan montok pokizazakan monoizuk om kes kinomi sabaagi kes noduso monigovo,” ka disido.
Pokionuon nogi disido o tuhun togumu ih kivaa kopoihaan kinantakan tu tumuubung boogizan pulis montok monuhung ponoizukan.