PRU-14: Joniston sumodia gumaga tirikohon Kiulu nung poingkakaton kawagu
KOTA KINABALU: Parti kopomuruanan Barisan Nasional (BN) tumilombus gumaga do tirikohon Kiulu ontok Pomilian tagayo Ginumuan ko14 (PRU-14).
Puru Lamin Koundangan Pogun (ADUN) Kiulu
Datuk Joniston Bangkuai (gambar) minoboros do sumodia gumaga do tirikohon sokiro do poingkakaton kawagu.
Poingkuro poh nga ka disio, toinsanan koputusan kikompitan kopoingkakaton nopo nga tumanud doid kuasa buruan kopomuruanan porinta.
“Ilo mimang nosiliu noh tonggungan tokou solinaid diti hinonggo ogumu noh ahal kotundaan pinapanau do porinta.
“Suntu dilo, Kiulu nopili sabaagi longkod ponombuluian labus kakadaian Sabah ih pinoboros ontok ‘bajet’ toun diti om kotundaan Kiulu potilombuson papanaon sokiro ko kotilombus tokou onuan kotumbayanan montok momorinta,” ka disio ontok romuto Utusan Borneo, hiti konihab.
Uhoto kokomoi kimpin ih maan owito ontok PRU-14 noboros disio do mogisusuai ahal ih maan poimbulaiyo doulu noh kikompitan ahal kounalan infrastruktur id Kiulu.
Ka disio, kounalan dilo kiguno kopio sabap do Kiulu maid laid tumounda idsuang kotundaan bogian ponombuluian suai ko kogunoon mogigion id watas dilo.
“Kiulu nosorilian miampai mogisusuai kampung tongokoodo hinonggo momoguo do kounalan tulun ginumuan ih mositi poinggoyoon miagal talun alun, waig tolidang om ogumu poh suai.
“Om mantad dilo, tantu noh do potontuon tokou montok tumilombus minggisom kumaraja lobi aparu montok popotounda Kiulu doulu noh kopompit do ahal tagayo diti ih nosiliu kogunoon tototopot rayat,” ka disio.
Ontok PRU nakatalib, nakamanang ih Joniston ginumu undian kiginumu 3,745 undi miampai paratus pongundian 81.50 paratus.
Minangala isio di calon gugumaga ih miningkakat montok mantad Parti Majus Sabah (SAPP), Bebas, Parti Keadilan Rakyat (PKR), om Parti Reformasi Negeri (Star).