Monginsada natagak nokito noumolig
BELURAN: Songulun monginsada ih pinoruput do natagak ontok minomukot id kawaigan Pulau Jambongan, nokito noumolig di kosuabon koniab. Munggui nointutunan sabaagi Mustapa Opong, 45, nokito di mogigion kampung kiikira jam 8.30 id koyuon olunggui noh nohuyan id disan daat Kampung Obah kiikira 6.6 batu nautika mantad tampat tohuri noh disio pinoruput do natagak. Potunud Maritim Watas Sabah om Labuan, Laksamana Muda Maritim Dato’ Mohd Zubil Mat Som minoboros do munggui ih nokito id koyuon nohuyan kopio nga natampasi om nowit noh doid Kampung Babago, Pulau Jambongan di bot monginsada tulun kampung mikuo winoyo di Bot Maritim Banggi 43. “Miampai natampasi munggui di ihumon, Papanau Karaja Mogihum om Mongumolig (Op Carilamat) nopupusan id jam 9.15 kosuabon,” ka dau. Pogului noboros di Zubil do ‘Op Carilamat’ ih ih suminuang tadau koduwo kopompit do harata KM Terbaru om Bot Banggi 43 mantad APMM Sandakan, iso bot aluminium mantad Koupisan Bomba om Mongumolig, iso ‘Inflatable Boat’ mantad Tinimungan Gugumaga Tulun Ginumuan (APM) om kiikira 20 bot monginsada mantad mogigion Pulau Jambongan nokompit miampai timpu kopomogihuman kilinaab 275 batu nautika persegi kopompit do kawaigan Pulau Jambongan gisom kawaigan Beluran. Kawagu dau, iso kapal sawat kawo sehin Beachcraft somporipori mantad Susumangod Sawat Diraj Malaysia (TUDM) Labuan om Tinimungan Papanau Karaja id Sawat PDRM nogi pinataru id koyuon poinsodia montok mongulud karaja maya ‘Operasi Carilamat’ diti. Idsuang ahal dilo, isio montok bogian APMM Watas Sabah om Labuan monongkotoluod kopio kumaa bogian TDUM, Tinimungan Papanau Karaja Id Sawat PDRM, Koupisan Bomba om Manampasi, APM om tinimungan maritim Pulau Jambongan maya sakadai harata montok papanau karaja mogihum Jom manampasi timpu diti. Minoboros Zubil do agensi diti nogi toririmo poinsodia ontok tikid timpu montok manahak ponulungan di kangaam kopio montok mogigion ngawi songkoiyonon ontok tulun ngawi songkoiyonon ontok antakan kaagaban toiko kaantakan taraat kinoiyonon. “Toinsanan tulun ngawi nogi pokionuon tuh toririmo poporuput id bogian APMM sokiro ko mitoguang miampai nunu noopo kobolingkangan id daat om obuli rumomut linimput operasi 24 jam APMM Watas Sabah om Labuan id numbur 088 -270165 toiko MERS 999,”ka dau. Namot dilo, Boyoon Koupisan Bomba om Mongumolig Malaysia (JBPM) Zon Sandakan Anddre Andrew minoboros do nokotorimo o bogian dau do pamalahauan kokomoi do kinantakan munggui id jam 11.41 kosuabon tadau Kolimo.