30 kadai nowuwu
# Kinotutudan di minsusuab koniab nogi minomunso iso masjid
KINABATANGAN: Sambaris kadai 30 longobon notutudan id kinantakan id Kampung Paris 3, hiti di minsusuab konihab.
Kinotutudan dilo nogi pinopohompit do iso masjid pitanga kotimporon ih notutudan 90 paratus.
Boyoon Koupisan Bomba om Mongumolig Malaysia (JBPM) Zon Sandakan Anddre Andrew minoboros do nokotorimo o bogian bomba do pamalahauan kaagaban maya MERS 999 kiikira jam 2.34 minsusuab.
“Tinimungan bomba mantad Balai Bomba om Mongumolig (BBP) Kinabatangan nuhupan do BBP Lahad Datu sinuhu minoi id tampat kinantakan kopoompit do 13 puru linuguanan di PBK II Asmori miampai duwo tinan injin FRT om iso injin EMRS,” ka disio.
Kawagu dau, tampat kinantakan poinsumpak kiikira 58 kilometer (km) mantad BBP Kinabatangan om 40 km mantad BBP Lahad Datu.
Minoboros Anddre do tinimungan bomba pinapaharo do pomisokan miampai minongukab iso koluyungan duwo koposomputan hinonggo natadon waig minaganu mantad kotos waig poingukab om pili bomba.
Poingkuro poh nga kinantakan dilo au kopohompit do kinosindualan om kinapataion.
“Papanau karaja pomisokan nakaanu minanamong id jam 5 minsusuab om nopupusan id jam 12.41 tangadau,” ka disio.
Minomisunud isio do hinonggo kinotutudan kikotumbayaan do tuminimpuun mantad iso lamin duwo tingkat om nakaralad doid kadai songingoros kiginumu 30 longobon om notutudan nogi iso masjid.
Ka disio, notutudan nogi duwo tinan padsakaian ilo nopo nga iso korita 4WD om iso van.
“Ginumu kinorugian om natadon kinantakan kakaal poh soriukon,” ka dau.