Ingaton nung kaanu koposodiaan karaja id labus pogun - Anifah
PAPAR: Pinosorou di Montiri Labus Datuk Seri Anifah Aman o rayat pogun diti ih kaanu koposodiaan karaja id labus poghun mooi do kapaganu do kopoilaan tototopot id pogun dilo maya lalansanon pogun dilo id Malaysia toiko ‘Kedutaan Malaysia’ id pogun nokoompit.’
Minoboros isio do ahal dilo kiguno sabap nosunudan oh bogian diolo kokomoi do kaparagatan tinan pointantu ih poposodia do kosiwatan pakarajaan mikuo monombului doid piipiro pogun pointantu om onuan batos miampai gaji di tosonong.
“Pinonoriukan timpuuni nokoilo do kaparagatan dilo nopo nga ponombirangan...onu ih pinokito do tinan ngawi di aiso tonggungan dilo osodu kopio mantad ‘realiti’ ih otoguang do rayat Malaysia ih muhang kumaraja id labus pogun.
“Sokiro ko nonggo-nonggo tulun sumuang do iso pogun aiso poomit toiko visa di totopot, kaamung poomit pakaraja songkosuaian, obuli iyolo onuon laang undangundang mantad bogian monguasa pogun dino nokomoi,” ka dau doid monunurat abar kalapas abaabayan Gumuli Doid Sikul id Sikul Tosuriba Kawo Kabansaan Pei Yin, Membakut doros hiti, konihab.
Minoboros Anifah do Kedutaan Malaysia nogi kotoguang doti kosusaan montok manahak do sakadai ‘konsular’ kumaa rayat Malaysia ih noilaan pakaraja id labus pogun miampai aiso poomit di totopot.
“Ahal diti nogi kotilombus obuli kopomiraag do ngaran pogun tokou.Mantad dilo, muhang oku poposorou do toinsanan tinan montok miingat-ingat om mongilag tinan mantad osiliu munggui ponipuan irad diti.
“Potitikid rayat Malaysia ih muhang tumombului nonggononggo pogun minog do tumanud do kooturan kosuangon om undang-undang kinoiyonon di kangaam kopio,” ka disio.
Id abaabayan dilo, pinapatahak nogi Anifah do toluod kantung sikul kuminaa 420 susumikul mantad 14 tinan sikul tosuriba id posorili Membakut. -Bernama