‘Simbanan tinan’ pogului monimban tulun suai - Anifah
PAPAR: Momuruan gugumaga id Sabah ih asaasaru momoguno slogan ‘simbanan’, soira orikot timpu pomilian tagayo, mositi ‘monimban tinan’ doulu noh pogului monimban tulun suai, ka di Montiri Labus Datuk Seri Anifah Aman.
“Ih moboros muhang monimban Sabah nopo nga, otutunan ku iyolo mantad podi tuminimpuun oku suminuang pulitik. Aiso komompuan diolo montok monulung rayat om iyolo sondiri momoguno do ponulungan montok tinan sondiri. Nung tokou koporintaan Barisan Nasional okon moboros ‘monimban’ nga tumilombus tokou monginsonong mantad iso timpu doid iso timpu,” ka dau.
Noboros disio ahal dilo ontok minanahak boboroson id abaabayan kapanahakan sakadai timpu madrasam kuminaa momukabun tokoodo gatah Bongawan, doros hiti konihab. Id abaabayan dilo kiginumu
700 momukabun tokoodo gatah posorili watas diti nokotorimo sakadai dilo mantad Kotinanan Pomorunan Gatah Sabah.
Anifah ih nogi Puru Parlimen Kimanis minoboros do sakadai dino nokomoi kigaab montok monulung toinsanan momukabun tokoodo ih nokotoguang kobolingkangan poompus timpu tolu wulan poompus timpu rumasam ilo nopo nga ontok wulan November, Disember 2017 om Januari 2018.
“Sakadai diti nopo nga laang tosonong koporintaan pogun sabaagi laang montok monulung papagaan do kawagatan balanja kopoposion toinsanan momukabun tokoodo gatah diti.
“Sakadai ih pinatahak diti okon kimpin pomilian tagayo. Koinsaruan abaabayan irad diti nopo nga montok monulung rayat. Mantad dilo nokoponorimo sakadai mositi momoguno miampai tososonong sakadai ih pinatahak,” ka disio. Bernama