Kinomi kawagu di Musa momuruan gugumaga pookodo tonggungan Rela
TUARAN: Kinomi kawagu di Boyoon Montiri Sabah Tan Sri Musa Aman konihab o laang songulun momuruan gugumaga id pogun diti ih popokodo do tonggungan om toluod puru Koupisan Sukarelawan Malaysia (Rela).
Pinosorou disio o momuruan dilo ih pogulu laid mongigit karaja montiri idsuang kabinet Pisompuruan, mooi do au osumbung om olihuwan tinan gisom katama paparaat do puru Rela.
“Iti okon ralan tokou, okon koubasanan tokou montok popokodo ngawi do tulun suai, lobi-lobi kagu puru Rela.
“Montok dogo, okodo toiko agayo toluod Rela tatap gatangon tokou sabap tonggungan diolo dilo montok koumoligan om kolumaagan rayat,” ka dau ontok pinotimpuun do kotorinaan puru Rela id Zon Oumolig Kosilahon Sabah (Esszone) id Longkod Pingludaan Rela Pogun Sabah hiti.
Maya video ih nakarayat id laman sosial ontok 15 Januari nakatalib, Porosiden Parti Warisan Sabah (Warisan) Datuk Seri Mohd Shafie Apdal ontok minanahak boboroson id abaabayan ‘Bicara Presiden Warisan’ id watas diti okitonan mangamuamu laang pinopoiyon do puru Rela di au abaal momoguno do sinjata tapui montok papanau karaja id Esszone.
Mohd Shafie pinoruput do minoboros do do puru Rela kangaam montok kotorinaan kapadtamangan trafik id abaabayan ngawi moginakan noopo.
Musa ih monosol miampai kopoilaan dilo minoboros do kinoposilihan porinta kumaa Rela sabaagi iso mantad agensi koumoligan pogun mositi pongunsikahan di rayat koinsasanai.
“Kinodimpotan Rela tantu noh do au kaanu pisingkiwalan kagu...opurimanan do porinta do osonong kopio montok Rela poingkawason songowian tinimungan om agensi suai montok mintamong koumoligan om kotoonongan songkoiyonon,” ka dau.
Boyoon Potunud Rela Zulkifli Abidin ih nokotindapou nogi id abaabayan dilo nogi kopuriman do kipanasalan kopio kumaa momuruan gugumaga dilo ih mongintong osuriba puru koupisan dilo miampai au kapaganu do kopoilaan potilombus kokomoi do karaja ngawi Rela id Esszone.
“Karaja ngawi Rela id Esszone nopo nga montok papanau do pimpanaan mogigion ngawi songkoiyonon solinaid 24 jam om okon papanau karaja id piwolitan. Karaja ngawi diti au momoguno do kopomogunaan sinjata. Nga kada intongai osuriba kumaa dagai om au minog paparaat dagai nung au orohian dagai,” ka dau.
Minoboros Zulkiflli do kinotindapaan 504 puru rela id Esszone mantad podi 1 Januari nakatalib kaanu manahak asil kumaa laang mongingkudi do rontob koimaan taraat om kaparagatan kopomilutan id bogian piwolitan.
Tumanud dau, puru ih nongopili nakatanud noh kursus poimbida kotorinaan Rela ih torinaon di mogisusuai agensi, pialatan ‘modul’ kursus kaamung ponorinaan sinjata tapui om kapanahakan kopoilaan. -Bernama