RM6 riong montok Rela id Sabah

TUARAN: Toluod koporintaan pogun Sabah kiginumu RM6 riong kuminaa Koupisan Sukarelawan Malaysia (Rela) pogun ponokotanda do koporintaan pogun toririmo mamagatang do tonggungan om karaja puru koupisan dilo, ka di Boyoon Montiri Tan Sri Musa Aman.

Ka dau au isio mosirosi montok popolulus do ginumu di agayo kopio, doulu noh montok papalantoi do karaja ngawi tinimungan Rela id bogian Zon Oumolig Kosilahon Sabah (Esszone) mantad podi 1 Januari nakatalib.

“Asaga kopio o koporintaan pogun montok manahak toluod diti mooi do bogian Rela kaanu momoli uniform om koumatan suai montok papasanang do papanau karaja ngawi id Esszone.

“Toluod diti sabaagi pamagatangan tokou kumaa puru Rela solinaid diti ih nakapanamong noh koumoligan om pinapanau karaja miampai noponu ‘komitmen’ om kitonggungan,” ka dau.

Noboros disio ahal dilo kuminaa monunurat abar kalapas abaabayan pinonimpuunan kotorinaan puru Rela id Esszone id Longkod Pingludaan Rela Pogun Sabah hiti, konihab.

Kiginumu 504 puru Rela pinakaraja id Esszone montok monulung mintamong koumoligan do hilo songowian ngawi tinimungan om agensi koumoligan suai.

Minoboros ih Musa do kaakun nogi koporintaan pogun montok poposodia do tapak montok pamansaian iso kagu longkod pingludaan Rela montok bogian kosilahon Sabah.

Tumanud dau, longkod pingludaan koduwo koupisan dilo maan wonsoyo id Sandakan id tapak kilinaab kiikira 20 hektar.

“Nokoponuhu oku noh potunud Koupisan Tana om Monukat Sabah montok momonsoi koposodiaan di kiguno montok papatahak tana kumaa bogian Rela.

“Iti osonong montok Sabah sabap tokon okon noopo haro longkod pingludaan id bogian kotonobon, papaharo tokou nogi iso kagu id bogian kosilahon ih kapanahak kounalan kumaa puru Rela do hilo montok papanau do pingludaan,” ka dau. - Bernama

Wookon puru Rela pinopokito do pokitonan id abaabayan dilo.

MUSA (tanga) om talap tapantang id abaabayan dilo.

MUSA momorisa nuludan tapantang kopinamot Abaabayan Pinoimaganan Karaja ngawi Rela id Esszone konihab.

MUSA pinoposokot tingot.