88 paratus PPKK pointongkop pogun
KOTA KINABALU: Kiginumu 88 paratus klinik kolidasan nakaanu minonuridong ‘Panel Penasihat Klinik ‘ Kesihatan (PPKK) id pointongkop pogun.
Kumoduo Montiri Kolidasan Datuk Seri Dr Hilmi Yahya minoboros do ilo ponokotanda do PPKK kakaal ‘relevan’ montok tulun ngawi.
“PPKK pinotimpuun mantad podi 1995 montok poposodia do kopoluyungan duwo ralan di kiguno montok papaharo do pisokodungan togirot pialatan tulun ngawi om puru kolidasan id kounalan kolidasan.
“Montok timpu diti, masaon porinta minggisom popogirot kagu laang tosonong montok popoingkawas do kopoomungan mogigion ngawi montok paparayat do kotorinaan kolidasan.
“Mantad podi pinonuridongan dilo, ilo okitonan nakalantoi miampai haro o kapamanan kaparagatan ih maid-laid kopongimbayat om nogi ponokotanda do ilo kakaal ‘relevan’,” ka disio.
Noboros disio ahal dilo ontok minanahak boboroson id Abaabayan Osuau Monokirumoh Miampai Puru Tinan Tutumobului Lamin Pongusapan om PPKK Zon Pantai Barat Sabah om Watas Pisompuruan Labuan, hiti konihab.
Ka dau koilo o porinta do kopoompitan om toluod puru tulun ngawi nopo nga ahal tagayo montok papatantu do kalantaian karaja popoingkawas do korikohonon kolidasan rayat.
Idsuang ahal dilo, minoboros Hilmi do Sabah nokoponurat do kiginumu 269 Puru Tinan Tutumbului Lamin Pongusapan hinonggo 185 tulun id 17 Hospital Zon Pantai Barat om 84 tulun id Hospital Zon Pantai Timur Sabah.
Watas Pisompuruan Labuan nopo nga nokoponurat do 25 Puru Kumakap Lamin Pongusapan id Hospital Watas Psiompuruan Labuan.
“Ginumu puru PPKK nopo nga nokoponurat do 2,480 tulun ilo nopo nga id 124 klinik kolidasan pointongkop Sabah om id Watas Pisompuruan Labuan ginumu diolo nopo nga 12 tulun ilo nopo nga id Klinik Kolidasan Labuan,” ka dau.
Namot dilo, kiginumu 17 Hospital Zon Pantai Barat nokotorimo RM10,000 sakadai montok Puru Tinan Kumakap Lamin Pongusapan id abaabayan dilo.
Nokotindapou nogi ih Potunud Kolidasan Sabah Datuk Dr Christina Rundi om Potunud Kolidasan Watas Pisompuruan Labuan Dr Ismuni Bohari.