Kurup pinapatahak 15 lamin kumaa munggui kinotutudan
KENINGAU: Montiri id Koupisan Luguan Montiri Tan Sri Joseph Kurup pinapatahak do 15 unit lamin kuminaa munggui kinotutudan id Kampung Pagalungan Ansip id bogian Sook, hiti di tadau Koonom.
Winonsoi lamin dilo miampai kos RM68,000 iso kaamung noh pinangawayaran lotirik om waig.
Lamin dilo haro tolu linimput om iso linimput waig om projik pinamansaian lamin nopo nga pininggisaman di Kurup maya poruntukan poimbida mantad Luguan Montiri.
Id abaabayan dilo, pokionuon disio o rayat tuh au monorimo pulitik pitinaruan di au kapanahak asil montok koburu nung kipomusarahan asampit om kiponirotan tosodu.
Ka dau, rayat mositi momili momuruan di ogumu pinopoobi karaja tosonong om toririmo monulung rayat.
Tumanud dau, koporintaan barisan Nasional (BN) ogumu minogowit kotundaan doulu noh kuminaa mogigion id labus kakadaian.
“Mongunsikou oku nogi kumaa agensi porinta om kotinanan okon porinta (NGO) ih nakapanahak nogi toluod kumaa munggui kinotutudan solinaid diti,” ka dau.
Kurup ih nogi Puru parlimen Pensiangan nogi mongunsikou kumaa Luguan Montiri sabap poruntukan di pinatahak kumaa rayat id Parlimen Pensiangan miagal RM3 riong montok projik PPRT, longkod hemodialisis Klinik Kolidasan Nabawan om minonginsonong talun alun.
Ka dau ilo ponokotanda do Luguan Montiri manahak pongintongan tawagat kopio idsuang ahal kotundaan doulu noh kumaa tulun ngawi id labus kakadaian.
Namot dilo, songulun ponorimo sakadai lamin, Jimim Awong monongkotoluod kopio kumaa Kurup sabap au tumingkod maganu kawagatan om manahak pongintongan kumaa kotundunan diolo solinaid diti, tuminimpuun mantad diolo miniyon naamot id linominon sikul soosomok sontoun gisom nopongo lamin minomonsoi lamin diolo.
“Asanang kopio yahai miampai lamin wagu diti om mongunsikou kumaa koporintaan BN,” ka dau.
Nokotindapou nogi id abaabayan dilo nga ih Kumoduo Presiden Parti Bersatu Rakyat Sabah (PBRS) Arthur Joseph Kurup, Monunurat Pulitik Montiri id Koupisan Luguan Montiri Richard Kastum, Boyoon Koonduan PBRS Longkod Zainon, Boyoon Komulakan PBRS Longkod Matusan Bowie, WKAN Anthony Ikin om ponorikohon panganjur Awong Tingkalon.