Sunsuyon Labuan kapanahak asil tagayo kumaa Beaufort: Azizah
BEAUFORT: Sunsuyon Labuan popiromut do tana tagayo Sabah ih maan potopoto kotumboyo kaanu manahak asil tagayo kumaa watas songingoros doulu noh bogian Parlimen Beaufort.
Kumoduo Montiri Kotundaan Koonduan, Paganakan om Mogigion Datuk Azizah Mohd Dun minoboros do miampai haro nopo sunsuyon dilo tiinu, ilo okon noopo kaanu monimban ‘landskap ekonomi’ watas Labuan nga kapanahak nogi asil tosonong kumaa watas Menumbok om Kuala Penyu ih kiharo id bogian Parlimen Beaufort.
Ka disio, longkod ngawi ponombuluian ih kiharo id Beaufort nogi kotumboyo koponorimo do korikotan tutumombului di lobi ogumu piagalon pogului diti miampai asil koponguhanan sunsuyon Labuan maya do Palan Kotundaan Labuan 2030 (LDB2030).
“Otumboyo kopio oku do sunsuyon Labuan dilo kapanahak doti asil di tagayo kumaa Beaufort doulu noh idsuang pomorunan ponombuluian. Okon noopo kopoingkawas ilo do korikotan tutumombului nga ontok timpu iso’i kapamagayat kaanangan papaapu labus montok momonsoi do kapaapuan,” ka disio.
Noboros disio ahal dilo ontok romuto do mununurat abar kalapas pinapaharo do Abaabayan ‘Bedudun’ (Ziarah) id kinoiyonon di songulun mantad mogigion id Kampung Selagon, konihab.
Id ningkokoton kikompitan, Azizah ih nogi Puru Parlimen Beaufort minomisunud do porinta idsuang pamalanan nogi kopoinggayo do talun alun Kuala Penyu-Menumbok ih osiliu ralan tagayo montok momomoguno talun alun pakaayan id watas Labuan.
Pinatarang di Azizah do ino posuangon id suang palan projik pamansaian Talun Alun Tagayo Pan Borneo.
Ontok tadau Kaapat nakatalib, pinapaharo ih Luguan Montiri Datuk Seri Najib Tun Razak do kakapan karaja doid Watas Pisompuruan Labuan montok pinotimpuun do Palan Kotundaan Labuan 2030 (LDB2030).
Ontok pinonimpuunan dilo, pinosuud di Najib do pamansaian sunsuyon Labuan-Menumbok okon noopo koponimban ‘ekonomi’ Labuan nga kopoingkawas nogi do kosuangon papaapu om papasanang do kapaapanaan mogigion goduwo-duwo watas dilo.