Minonimpuun longkod kotundunan dinawa minanambarana, minangasou duwo tangaanak tamangan
KUALA LUMPUR: Kalapas sawo dau dinawa minipakat miampai dau kokomoi do panandasan minangasou duwo tangaanak tondu id longkod kotundunan, koniab sawo nopo nga pinotoguang id kuut id Ampang hiti kokomoi siam panandasan pialatan dilo minanambarana om minangasou tangaanak id longkod dilo om kiharo kakamot koikumikum.
Natandasan, Zahari Alwi, 56, ih ponogi minonimpuun longkod dilo mangakun au kasala id tolu kuut misusuai sabap duwo panandasan minanambara, tolu panandasan minangasou koikum-ikuman om tolu panandasan kiharo kakamot koikum-ikum kaamung koikuman pilasu.
Koinsanai panandasan binasa miampai misusuai id doumbangan Hakim Mahkamah Sesyen Mohamad Kamil Nizam, Majistret Mohamad Firdaus Sadina Ali om Majistret Haslinda A.Raof.
Id doumbangan Hakim Mohamad Kamil, kusai dilo minamakai rasuk lokap kiwarana oren om minongokop wuros dau miampai topeng wuros dinawa sabap duwo panandasan minanambara songulun tangaanak tondu kiumur 11 toun id suang linimput toodopon id duwo tinan longkod kotundunan id Keramat hiti pialatan 2016 om Ogos 2017.
Tinandasan isio tumanud Seksyen 376(1) Kanun Koinggoritan om binasa songowian Seksyen 16 Akta Kasalaan Kasalaan Seksual Kumaa Tangaanak 2017 ih mogowit ukuman jiil au kolobi 20 toun om minog nogi ontokon pasut, nung katantu kasalaan.
Id doumbangan Majistret Mohamad Firdaus, natandasan dinawa sabap tolu panandasan minomonsoi laang tokodou koimaan taraat kuminaa munggui iso’i om songulun kagu tangaanak tondu kiumur 10 toun miampai komoyon minangasou kapantangan diolo id liwang tombului id duwo premis iso’i, pialatan Disember 2015 om 2016.
Kotolu-tolu panandasan pinosuul tumanud Seksyen 354 Kanun Koinggoritan ih mogowit ukuman jiil au kolobi 10 toun toiko danda toiko pasut toiko nonggononggo duwo mantad ukuman dilo, nung katantu kasalaan.
Nokotoguang nogi kusai dilo do panandasan kiharo filem koikum-ikum ih au kopitunud miampai kapantangan tulun ginumuan id suang linimput id premis iso’i, ontok 7 dongotuong, 10 Jan 2018 tumanud Seksyen 5(1) Akta Penapisan Filem 2002 ih kopongobi do ukuman danda au kolobi RM50,000 toiko kojiil gisom limo toun toiko doguwo-duwo dilo, nung katantu kasalaan.
Id doumbangan Majistret Haslinda nopo nga, natandasan dinawa miampai komoyon do minog mangasou koikuman munggui ih kiumur 11 toun miampai laang minongukab longobon pagawasan id longkod kotundunan iso’i id jam 1 tangadau, Disember 2015.
Panandasan winonsoi tumanud Seksyen 509 Kanun Koinggoritan ih kopogowit ukuman jiil au kolobi limo toun toiko danda toiko goduwo-duwo ukuman dilo, nung katantu kasalaan.
Tinandasan ih Zahari sabap duwo panandasan ilo nopo nga minomonsoi om kiharo gambar koikum-ikum popotigowo munggui iso’i id suang komputer riba om kiharo kakamot koikum-ikum okitonan koikuman kusai, sompori-pori id jam 1 tangadau, Disember 2015 om jam 7 dongotuong 10 Januari nakatalib id duwo tinan premis iso’i.
Panandasan tumanud Seksyen 292(a) Kanun Koinggoritan ih kopogowit ukuman jiil au kolobi tolu toun toiko miampai danda toiko goduow-duwo ukuman dilo, nung katantu kasalaan.
Kumoduwo Mangadawa Tagayo Nadiah Malek Fauzie, Norhashimah Hashim om Raihanah Abdul Razak au minanahak onu noopo jaminan miampai alasan natandasan masaon papanau do ukuman jiil id suriba akta kasalaan ngawi ‘seksual’ kumaa tangaanak.
Luyar Illynadiah Mohd Yusof ih minongobi natandasan au pinoposuul do onu noopo bantahan au papakawasa natandasan kagasan jamin om pinapatantu do 21 Mac montk pamaraitan kawagu toinsanan kes.
Ontok 29 Januari, sawo natandasan Khairulbariah Mian, 29, minangakun au kasala id Kuut Majistret hiti sabap tolu panandasan miupakat miampai natandasan kokomoi do pangadawaan mangasou duwo tangaanak tondu id duwo tinan premis iso’i, tolu toun nakatalib. -Bernama