Madius manaak sokodung kopongia’an profisinol boros Kadazandusun
TUARAN: Laang popointutun kopongia’an boros Kadazandusun profisinol sokodungon kopio mongoi kotumboyo nodi oh koibokon kopotungkusan boros sandad miampai koburuon kopooposion timpu diti.
Minoboros ih Montiri Sains, Tiknologi om Inovasi, Datuk Wilfred Madius Tangau do sokodungon kopio kopongia’an boros Kadazandusun di poimburu kaampai no kopomogunaan do tiknologi.
“Mantad dii do pokionuon kopio toinsanan tabaal kopongia’an boros Kadazandusun montok mongimbulai karalanon mongia om popotungkus do boros sandad mongoi do oukab nodi oh kosiwatan kumaa sakag kawawagu ngawi do minsingilo id boros tokou,” ka di Madius.
Pinopointalang ih Madius dilo tu iyau po nogi wagu oh Puru Parlimen Tuaran di ontok pinopoimagon do Sominar Boros, Koubasanan om Kogingaan Boros id SMK Tamparuli hiti di songkoniab.
Sominar nayu do Universiti Pendidikan Sultan Idris (UPSI) nopo dilo nga nakapaampai do 10 tabaal pinopolombus do soriuk diolo id doguang pikiikiro do 100 susumikul longkod balajaran takawas.
Pinopointalang ih mononsunud mangayu, Dr Rosliah Kiting do 80 piatus tindapou do sominar dilo nopo nga susumikul mantad mogisusuai longkod pinginabasan takawas miagal do UPSI, Universiti Malaysia Sabah (UMS), Universiti Malaysia Sarawak (Unimas), Institut Pendidikan Guru (IPG) om wookon susumikul lintanga om mogiigiyon id Tamparuli.
Wookon pinopolombus do soriuk diolo nopo nga kaampai no ih Raymond Majumah miampai karatas karaja dau ‘Bhahul Sisindion Kooubasanan Rungus’, Fidelis Sipangkui (Ningkokoton Pongia’an Boros Kadazandusun: Atag do Popoburu om Pokisokodungan do Kopolintaan), Dr. Rosliah Kiting (Ponuntudukan id Poinukadan Kadazandusun), Linah Bagu (Elemen Koubasanan id Ponuatan Kreatif Kurikulum Boros Kadazandusun Sikul Tosiriba).
Witer Gunik (Popokoris Boros Kadazandusun Maya Ponuratan Roiton id Sinding: Borolos id Roiton do Sinding Kadazandusun), Joisin Romut (Kounalan Popotungkus Boros Kadazandusun: Peranan Mongingia’, Molohing, Tulun Posorili om Sukod Wagu), Rusinah Sinti (Kopomogunaan Pimato / ‘ / id Mato Balajaran Boros Kadazandusun: Iso Pongintangan Mantad Toun 2005 gisom Baabaino) om Tindarama Benedict Topin (Rati Poing Kad azan dusun ).
Sominar dili nokoimpuun di jam kosiam kosuabon om nopupusan di pikiikiro jaam kotolu sodopon.