Tambalut tosonong porinta
# Tulun ngawi Sina papanau tonggungan popogirot do ‘ekonomi’ - Musa
KOTA KINABALU: Mogigion ngawi Sina id Sabah nopo nga tambalut tosonong kumaa porinta diti sabaagi laang mogiwowoyo ngawi rumulud poposiliu ‘ekonomi’ lobi koburu.
Minoboros ih Boyoon Montiri Sabah Tan Sri Musa Haji Aman do tonggungan ih papanaon do tulun ngawi Sina id Sabah doulu noh id suang kaganaan padagangan om kopongindapuan nokoponulung noh pinopogirot do ekonomi pogun diti.
“Pokionuon ku kumaa toinsanan mogigion ngawi Sina hiti montok monokodung iman-imanon om abaabayan kotundaan porinta ih kapanahak asil kumaa toinsanan rayat ontok momodimpot ‘status’ pogun kipandapatan takawas tiinu.
“Kaandangan pulitik ih naanu baino diti mositi gompion om potilombuson montok dotokou songowian ngawi mogowit koburuon di lobi tosonong om kopongunsikou id Sabah.
“Ilo nogi papatantu do abaabayan kotundaan di napalan om masaon mabpanau kaanu papanau miampai aiso kaantaban,” ka dau ontok pinotimpuun do Karamaian Sayau Naga, Unikon om Singa 2018, hiti konihab.
Minoboros isio do kinalantayan pinanganjuran abaabayan koubasanan irad dilo ponokotanda do pisokodungan pialatan tulun ngawi Sina om koporintaan pogun ogirot montok popointutun do koubasanan mogigion dilo.
Tumanud dau, koporintaan pogun nopo nga iso porinta kikoinsamadan kumaa toinsanan rayat Sabah. Tikid toun nakatahak noh poruntukan kumaa lamin ngawi kaagamaan tulun ngawi Sina om sikulan.
Minoboros ih Musa do toinsanan rayat Sabah poimpasi id suang iso pogun di mogisusuai bansa suai ko opuawang miampai kopogisuaian koubasanan.
“Festival ih pohoroon diti haro o susuian dau ih sosondiri montok popointutun tulun ngawi Sina id pogun diti suai ko papanau do tonggungan kiguno montok popisompuru do kopogisuaian tinimungan kointutunan id Sabah,” ka dau.
Id abaabayan dilo, pinapatahak nogi ih Musa do poruntukan kiginumu RM200,000 kuminaa Koisaan Rayat Sina Misompuru Sabah id Kota Kinabalu (USCCA) hinonggo RM50,000 montok panganjuran karamaian dilo om nolu dilo montok pomoli tulu singa di toinsanan koisaan sayau singa ih poinlungung id suriba USCCA.
Nokotindapou nogi ih Montiri Karaja-karaja Poimbida Datuk Seri Panglima Teo Chee Kang, Konsul General Republik Rayat China id Kota Kinabalu Liang Caide, Mayor Bandaraya Kota Kinabalu Datuk Yeo Boon Hai om Presiden USCCA Datuk Susan Wong.