Hospital Gleneagles minonuridong ‘Pusat Lasik’ koiso id Sabah
KOTA KINABALU: Laang Hospital Gleneagles pinopointutun do ‘Pusat Lasik’ koiso id pogun diti okitonan koponulung doti poposigampot do karaja porinta poposiliu do Sabah sabaagi tiyonon ponombuluian pongubatan.
Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun minoboros do sabap do ogumu ponuludan kotilombus mantad tiyonon sompomogunan rumikot id pogun diti, ilo kapanahak kolobian kumaa Sabah.
Ka dau, Kota Kinabalu nopo nga tiyonon di asanang suangon di tutumombului. Mantad dilo, suai ko rumikot montok monombului, obuli nogi iyolo kapaganu do kotorinaan pongubatan di tosonong kopio id Gleneagles
Kota Kinabalu (GKK).
Otumbayaan iso do korikohonon di kangaam kopio om kos pongubatan di osodu lobi osuriba piagalon pogun suai koposiliu doti do pamagayatan kumaa tutumombului montok kapaganu do kotorinaan pongubatan id pogun diti.
“Sabah nokotorimo kinosuangon tutumombului China di togumu tikid toun om mantad dilo, Hospital GKK mositi maganu kosiwatan diti montok papalaku om popointutun do kotorinaan diolo kumaa tutumombului China.
“Ino koponulung doti poposiliu do Hospital GKK kotilombus ointutunan sabaagi poposodia kotorinaan kapadtamangan kolidasan,” ka dau id abaabayan pinotimpuun ‘Pusat Lasik Hospital GKK’, hiti konihab.
Namot dilo, Boyoon Upisor Eksekutif Hospital GKK Jean-Francois Naa minoboros do kakamot kapalabusan kawawagu dilo kotilombus popoiyon do GKK id tigulu idsuang ahal karaja panamangan kolidasan.
Ka dau, pokimamaan diolo nopo nga montok mamagayat lobi ogumu tulun sumakit labus pogun montok kapaganu do kotorinaan pongubatan id lamin pongusapan dilo.
“Montok pongubatan ‘laser’, yahai toisosio ih poposodia do karaja pongubatan diti kikalansanan kaanu monulung GKK montok tumilombus id tigulu sabaagi poposodia panamangan kolidasan id Sabah.
“Alansan nogi yahai tuh kaanu monulung popotounda do ponombuluian pongubatan id pogun diti. Mokimaamaha tokou lobi ogumu suamkit mantad Indonesia om Kalimantan rumikot id GKK montok mokiubat hiti,” ka dau.
Ponorikohon Mercy Malaysia Raan Sabah Dr Anbarasu Ramalingam minoboros do katanud miampai pinoimanagan ‘Pusat Lasik’ dilo, Mercy Malaysia songowian GKK papanau do Kempen #LoseTheGlasses montok monulung tinimungan momoguno.
Ka dau kimpin ih momoguo do tombului monoluod do soromin mato dilo kigaab montok monulung tulun ngawi labus kakadaian di aiso kamampuan montok kapaganu do soromin mato.
“Soromin mato ih pinotoluod maan gatango om tandaan tumanud rontob osohut ponirotan (power attrition) montok papasanang ino pibobogion doid watas di noilaan noh tiinu,” ka dau.
Kotak toluod montok soromin mato dilo poiyonon id lobi Hospital GKK tuminimpuun konihab.