Imigresen Kulim powolion doid tiyonon lobi kangaam

KULIM: Upis Imigresen Watas Kulim powolion doid tiyonon di lobi kangaam om olumaag id suang timpu tosomok.

Boyoon Kumoduo Ponulung Potunud Koupisan Imigresen Watas Kulim, Muhamad Ali Abdullah minoboros do norikot nodi o timpu do upis imigresen ih kiharo id Ralan Lunas, Taman Seluang hiti powolihon sabap asampit om au oumolig.

“Upis posodia haro baino au nodi kangaam montok mongobi koporumposan tombului doulu noh ontok tadau Minggu. Iti sabap, Imigresen Kulim-Bandar Baharu okon noopo koponorimo tombului mantad posorili kaabatan Kedah nga Pulau Pinang nogi.

“Om nogi tiyonon dilo ih kiharo id linominon lamin kadai om poingoros ralan tagayo, kapangalap kobolingkangan di mogisusuai miagal mamabak sumuang,” ka dau ontok romuto media id Karnival Sipoot Komontirian Suang Pogun (KDN) Bogian Kulim-Bandar Baharu hiti konihab.

Karnival ih kumoinsan nogi pinaharo dilo notindapou di lobi 1,500 tulun mantad 12 agensi id suriba KDN kaamung Tinimungan Gerakan Am, Koupisan Imigresen, Rela om Tinimungan Gugumaga Tulun Malaysia miampai 500 tulun uminampai limo abaabayan di pinialaan ilo nopo nga mimbuul, bola jaring, badminton, migayat dukug om sukaneka.

Pinatarang dau, papanau karaja mongilo tiyonon om kopowolihan upis imigresen dilo nopibarasan noh om baio magandad noopo do kookunan mantad tinan dilo.

“Au tokou poh nakatantu tiyonon totootopot nga mongintong koiyonon id Kulim Hi-Tech nopo nga kangaam kopio mantad ahal kalaabon, koumoligan om kounalan suai kaamung pakir,” ka dau.

Id suang ahal dilo, Puru Parlimen Kulim-Bandar Baharu, Datuk Abdul Aziz Sheikh Fadzir minoboros do kopowolihan dilo nopo nga pialatan pamalanan montok popomogot ‘infrastruktur’ id watas suai.

“Onu ih kiguno, tiyonon om linominon wagu dilo popotimpuun do karaja ngawi tombului doulu noh kopohompit do visa om pasport,” ka dau.