Kusai nokito poinluub kikotumbayaan noduso nolonod id disan daat Tanjung Aru

KOTA KINABALU: Songulun kusai nokito do poinluub kikotumbayaan do noduso nolonod id disan daat Taman Prince Philip Tanjung Aru, doros hiti, kosodop.

Boyoon Pulis Watas Kota Kinabalu Asisten Komisioner M.Chandra minoboros do munggui Lim Chung Wui, 56, nokito do tulun togumu id koyuon poinlatan id disan daat dilo.

“Nokotorimo o bogian pulis do pamalahauan kokomoi do kinantakan dilo id tadau Koonom kiikira jam 6.05 sosodopon.

“Pinonoriukan timpuuni nokoilo do munggui nokito di tulun ginumuan id koyuon poinluub id waig id disan daat Tanjung Aru 2 pogului nowit doid disan daat om nonuan ponulungan kaagaban nga au nakaanu minanampasi.

“Tulun ginumuan kalapas dilo ruminomut bogian pongubatan Hospital Queen Elizabeth om upisor pongubatan pinapatantu munggui minidu pogun, poingkuro poh nga natadon kinapataion au poh kaanu papatantu,” ka dau id iso kopoilaan hiti konihab.

Minoboros Chandra do tinan munggui kalapas dilo pinaatod doid Koupisan Forensik montok pokizazakan monoriuk montok mongilo natadon tototopot kinapataion munggui.

Ka dau, tinan munggui pokizazakan monoriuk soira waris munggui kaanu mongilo. “Pinomorisaan id Disan Daat Tanjung Aru 1 nokokito do padsakaian sanganu munggui kawo Proton Saga.

MUNGGUI nowit di bogian koumoligan.

“Nokokito nogi surat kointutunan tinan munggui om suai-suai barang sondiri sanganu munggui,” ka dau.

Tulun togumu ih kotutun munggui pokionuon montok rumomut om poposunud do kinantakan dilo kumaa waris paganakan munggui om rumikot id balai pulis ih songindoros toiko rumomut di Sub Insp Wagiman Seno (0168436999).

Kes kinomi sabaagi noduso monigowo.