Momili porinta kotumboyo kaanu mintamong kotundunan rayat: Najib
PUTRAJAYA: Toun 2018 nopo nga kiguno montok rayat momonsoi koputusan momili bogian di kotumboyo obuli monorina pogun, toririmo mintamong kotundunan rayat om sumirot id tigulu, ka di Luguan Montiri Datuk Seri Najib Tun Razak.
Id pitimungan wulanan Koupisan Luguan Montiri (JPM) id Dataran Perdana hiti konihab, minoboros ih Najib do montok dilo, momoguno nogi porinta do toinsanan pakakaraja tulun ginumuan montok papanau do ponorinaan pogun miampai opurokis, awakas om kipironitan mooi do toinsanan laang tosonong porinta korikot doid longon rayat.
“Nga nung olunggui pomusarahan tokou toiko momoruhang kobolingkangan miampai aiso panalasaian toiko oindamaan kikoulalahon ‘red tape’, tantu nopo do au tokou kaanu momogonop kalansanan rayat,” ka dau id pinitimungan wulanan JPM koiso montok toun diti. Pitimungan wulan nakatalib noidu sabap koyuon tawan.
Minoboros isio do mamatos oku porinta buruanan dau kumaa rayat ih winonsoi ontok limo toun nakatalib nakaanu minomodimpot 97.6 paratus kinapamanaan dilo di au doti osiliu kotopotan nung aiso pisokodungan togirot id pialatan pakakaraja tulun ginumuan.
“Iso piromutan di kiguno kopio potilombuson tokou momogompi om papawakas kagu sabap pakakaraja tulun ginumuan nopo nga tulang toruntud ih pokilansanan tokou montok momodimpot iman-imanon tagayo montok Malaysia,” ka dau.
Najib ih nogi Montiri Kousinan minoboros do ogumu noh kinalantaian di nosigampot pogun miampai ih kawawagu, ‘Forum Ekonomi Dunia’ ih pinapataru do Malaysia sabaagi pogun Asia poinsosonong idsuang ‘Indeks Pembangunan Inklusif’ (IDI). Tumanud dau Malaysia kiharo id numbur 13 id pomogunan om iso id Assia, om China id tampat ko-25 om India numbur 62.
Noboros di Najib do gatang Ringgit nogi nokopogirot miampai nakatalib rontob psikologi RM4 ontok 5 Januari nakatalib om nosiliu pialatan mato tusin ih nokoponurat korikohon tosonong kopio id pomogunan.
Ka dau Ponorikohon Suruhanjaya Sekuriti Datuk Seri Ranjit Ajit Singh pinoposunud do kopogirotan gatang Ringgit dilo pinotoluod di kinosuangon kousinan songkosuaian sabap kotumbayanan nokomoi ralan tonudon ngawi pogun, suai ko kinoinsawaton gatang tumau.
“Iti noh ahal ih aanu tokou mintong, om toun diti papanau do Bajet 2018, ih okitonan ‘inklusif’, haro toiso-iso montok toinsanan idsuang bajet diti,” ka dau. - Bernama