UPKO posodia manangod
# Montok mamahantoi mahik tiikon Parlimen, Pogun id Penampang
PENAMPANG: Pertubuhan Pasokmomogun Kadazandusun Murut Bersatu (UPKO) sumodia montok mamahantoi mahik tiikon Parlimen Penampang om duvo tiikon Hamin Koundangan Pogun (DUN) id boogizan dino montok Barisan Nasional (BN).
Monovohi naamot Polosiden dau Pemangku Datuk Seri Wilfred Madius Tangau (gambal) minoboos do BN Penampang baino au nodi mimang dumadi gugumaga id boogizan Parlimen dino sohinaid himo toun mantad podi au nakaanu guninaga do tiikon Parlimen om tiikon DUN Moyog om Kepayan id pomihian tagazo ginumuan ko-13 (PRU-13).
“Zotokou (BN) nadadi ‘gugumaga’ id Penampang, nga zotokou no ih tomoimo manaak kalaja kumaa layat id boogizan diti. Zotokou hangadon kozo dumadi hansanon layat doiti. Zotokou mositi otumbozo montok kahantoi om nopo nga adadi tonggungan tokou montok kahantoi.
“Ada kozo kotumbazai do gugumaga kahantoi ontok PRU14,” ka disido ontok pinotimpuun do Injin PRU14 UPKO Penampang doiti koniab.
Ontok PRU13, Polosiden Tapantang UPKO Tan Sri Bernard Dompok naaha doid calon PKR, Darell Leiking montok mamaga’au tiikon Parlimen Penampang.
Tiikon DUN Moyog nopo nga au nakaanu guminaga di calon UPKO Datuk Philip Lasimbang ih naaha di Terrence Siambun minomoguno tiket PKR, om a Datuk Edward Khoo mantad MCA naaha doid calon DAP Dr Edwin Bosi montok mamaga’au tiikon DUN Kepayan.
Leiking baino Kumoduvo Polosiden Parti Warisan Sabah (Warisan) om Siambun nogi nga minundahiu doid Warisan, om Bosi minundahiu doid Parti Anak Negeri.
Tangau, ih nogi Montili Sains, Teknologi om Inovasi, nogi minoboos do nokokinam zi Bosi minisoomo miampai dau om minamahazou kalaja UPKO om minoboos do aanangan montok sumuvang parti pikouvangan BN dino nga manaak tanda montok poimpuu UPKO om poingkakaton mahik montok tiikon DUN Kepayan.
“Nga pinopoiho zou do ih tiikon Kepayan nopo nga sanganu MCA om UPKO aiso hak montok mamaga’au dino,” ka disido miampai pinoposoou puu parti mooi au ompuvong miampai moninduo om ahal ih gunoon di gugumaga.
Ka disido, gugumaga tomoimo tumoguvang ‘konflik’ kaamung montok papatantu poingkakaton vozoon montili nung onuan kuasa montok momuu’an kopolintaan pogun.
“Undion nopo BN sabap tantu no do vozoon montili nopo nga puu BN iho nopo nga Tan Sri Musa Aman.
Montok poingkakaton huguan montili nopo nga, tantu no Datuk Seri Najib Tun Razak. Gugumaga nopo nga mimang songuhun momuu’an ih kiumul no 93 toun,” ka disido. -Bernama