Esscom tumilombus popoingkawas rontob koumoligan
LAHAD DATU: Tinimungan koumoligan nigitan Bogian Koumoligan Poimbida Papak Kosilahon Sabah (Esscom) manahak jaminan rontob koumoligan id Sabah potilombuson poingkawason tuh koidu mantad kes panazangan.
Komander Esscom DCP Datuk Hazani Ghazaili minoboros do Esscom nopo nga iso suntu Strategi Lautan Biru Kebangsaan (NBOS) poinsosonong ih haro id Malaysia.
“Miampai pironitan tinimungan koumoligan ih haro, tumilombus tokou mangantob tuh kes irad dilo au nodi antakan id pogun diti. Tolu tinimungan kaampai mantad tulun ginumuan nogi tumilombus gumura montok mintamong koumoligan,” ka dau.
Noboros disio ahal dilo id abaabayan manahakrumamit karaja Boyoon Staf Bogian Operasi Tindal mantad SAC Datuk Zulkiffli Hj Salleh kumaa di SAC Mazli Mazlan ih sinaasi disio sondiri id Longkod Upis Tinimungan Pulis Marin Wilayah 4, hiti konihab.
Idsuang ahal dilo, noboros di Hazani do misokodung Esscom miampai tinimungan koumoligan suai doulu noh PDRM montok mintamong koumoligan, kotoonongan om koinsasanai ontok PRU14.
Montok tujuan dilo kadau, bogian koumoligan Esscom nogi maganu kawagatan montok popogirot kagu gugumaga id daat montok mongilag do ahal di au osonng antakan.
Ugu nogi dilo id bogian tindal hinonggo bogian dau papaharo longkod pomorisaan om susuai poh, papaharo do panalaban talun alun songowian PDRM om ATM montok mangantob ahal di obuli mangasou do kapapanaon pomilian tagayo tiinu.
“InsyaAllah, rontob koumoligan id pogun diti maan potilombuso om tantu potimporonon tokou onu ih haro dotoou baio diti,” ka dau.
Nokotindapou nogi id ramai dilo nga ih Kumoduo Komander Esscom, Brig-Jen Dato’ Badrul Hisham, Komander 13 Briged Esscom Brig-Jen Hamdan Ismail, Boyoon Staf Tinimungan Poimbida SAC Mohammad bin Madun om Boyoon Staf Bogian Operasi Daat Laksama Kamaruszaman Abu Hassan. Namot dilo, Mazli minongolon Zulkifli, 59, ih koolon doid Longkod Upis Pulis Diraja Malaysia Bukit Aman miampai mongigit karaja sabaagi Boyoon Ponulung Potunud Gerakan Koupisan Koumoligan Suang Pogun om Kotoonongan Tulun Ginumuan.