Tolu ‘suspek’ papatayad dadah tinaan pulis
SANDAKAN: Pulis mantad Koupisan Ponoriukan Jinayah Narkotik (JSJN) IPD Sandakan minanaan tolu kusai id pinonugkuan misusuai sabap kikotumbayaan kiharo dadah kawo methamphetamine.
Boyoon Pulis Watas Asisten Komisioner Mohd Azhar Hamin minoboros do ‘suspek’ koiso kiumur 27 toun tinaan kiikira jam 8.45 dongotuong tadau Kaapat nakatalib (1 Februari) ontok suminakai iso motosikal kawo Yamaha 125Z sabap noilaan kiharo dadah miampai anggaran 50.1 gram.
“Asil pinomorisaan idsuang paket sorual bogian tigulu ponong gibang ih pinakai ‘suspek’ kiharo iso polositik kiwarana obiru hinonggo idsuang dilo kiharo iso sampul surat kiwarna opurak nosuratan ‘BY AIR MAIL PAR AVION’ om soira nukaban noilaan id suang dilo kiharo iso paket polositik oniting kikotumbayaan dadah kawo methamphetamine (syabu),” ka dau.
Kinagakaman koduwo, ontok tadau ih iso’i kiikira jam 9.30 dongotuong, asil laang pionugutan, bogian JSJN IPD Sandakan ih pinapaharo pinonugkuan om pinomorisaan id iso lamin aiso numbur id Batu 11 om minanaan songulun kusai tulun songkosuaian kiumur 46 toun id suang iso linimput id lamin dilo.
Asil pinomorisaan id suang linimput dilo nokokito iso paket plastik oniting kisuang kakamot kikotumbayaan dadah kawo methamphetamine, iso kakamot timah, iso pangapui ih sinimbanan om iso sampul surat id sakai dulang plastik kiwarna aragang id sakai sirang.
Soira nukaban, noilaan ilo kisuang iso paket plastik oniting kikotumbayaan dadah kawo methamphetamine kiwinagat 51.0 gram.
Kinagakaman kotolu ontok 3 Februari jam 2 minsusuab, sontimungan pulis mantad JSJN IPD Sandakan pinapaharo pinonugkuan id iso lamin aiso numbur id Kg Forest om minanaan songulun kusai tulun songkosuaian kiumur 55 toun ih kiharo id suang iso linimput id lamin dilo.
Asil pinomorisaan nokokito iso kantung tokoodo kiwarna otomou idsuang paket bogian tigulu ponong wanan sorual pinakai suspek om nokokito 94 paket plastik tokoodo kisuang dadah kawo methamphetamine songowian siam lipatan karatas timah. Anggaran winagat omumuk dadah ih na’au nopo nga 9.4 gram.