Upko minggisom momogompi boros Kadazandusun papatantu ino oguno di sinakagon baino om timpu rumikot - Madius
TAMPARULI: Minggisom kopio Upko montok momogompi boros Kadazandusun om papatantu dilo kotilombus gunoon di sinakagon baino om timpu rumikot.
Ponowoli naamot Porosiden Upko Datuk Seri Wilfred Madius Tangau minoboros do tulun ngawi Kadazandusun kiharo id suang koligogon atagakan boros sandad sabap sinakagon tomulok tulun ngawi dilo au osongkuro moboros om au osongkuro momoguno do boros dilo.
“Nga pounsikou kumaa pongintutunan boros Kadazandusun sabaagi mato balajaran (subjek) id sikulan, ilo au nodi osiliu kobolingkangan,” ka disio.
Poingkuro poh nga ka disio, kakaal haro poh ih minog kopio wonsoyon sundung pia ogumu ahal kinalantaian sabaagi kapatantuan potilombus mantad kinopoomungan Upko om kopurokisan miagal montok minokianu mooi do boros Kadazandusun posuangon id suang ‘kurikulum’ balajaran.
“Pomogompian tungkusan om koubasanan momogun, ih kaamung noh boros sandad tokou, nopo nga iso mantad turu ‘ideologi’ Upko. Tumilombus yahai minggisom montok papatantu do tulun ngawi Kadazandusun au atagakan nonggononggo kopontingan diti,” Montiri Sains, Teknologi om Inovasi dilo.
Madius ih nogi Puru Parlimen Tuaran ounsikou minintong pinangaramitan di kopongunsub kopio mantad kolej momoluda mongingia om sikul pintangaan ih minaganu bogian idsuang sominar kokomoi boros, koubasanan om kesusasteraan Kadazandusun ih pinanjur di Fakulti Boros om Komunikasi Universiti Balajaran Sultan Idris (UPSI) Perak id SMK Tamparuli, hiti di tadau Kaapat.
“Iti kangaam kopio miampai gaab papatantu do sinakagon timpu tabantalan tokou au olihuwan boros sandad diolo, ka disio minamot minamarayou pensyarah wanan UPSI montok boros Kadazandusun, Dr Rosliah Kiting ih pinotimpuun do sominar dilo.
Montok rikud, koponudukan boros Kadazandusun id UPSI Perak pinoimagon di vagas porosiden Upko Tan Sri Bernard Dompok.
“Montok dagai id Upko, manahak sokodung om sakadai poimponu tumanud kamampuan dagai,” ka disio ontok pinotimpuun do sominar dilo.
Tumanud Madius, 57 mantad 75 sikulan tosuriba om limo mantad 11 sikulan pintangaan id watas dau pinoposodia do ‘subjek’ dilo mantad podi pinongintutunan ‘kurikulum’ boros Kadazandusun.
Gisom baino diti, ginumu susumikul ih minaganu ‘subjek’ boros Kadazandusun id pogun diti nopo nga 55,566 mantad 384 sikul tosuriba ih kopohompit do 1,100 mongingia.
Namot 4,416 susumikul minaganu subjek id 45 sikul pintangaan kopohompit do 94 mongingia.
Id bogian tinan ponginabasan takawas, UPSI haro 143 ‘siswazah’ om pinapahasil do 97 ‘graduan’ montok monuduk boros Kadazandusun.
Id IPG Kent, tinan pingludaan mongingia id Tuaran baino haro 55 siswazah id suriba turu pensyarah om pinapahasil do 18 graduan ih kiharo noh idsuang karaja ‘interim’.
Montok IPG Keningau, ilo baino haro 45 mahasiswa id suriba tolu pensyarah montok subjek boros Kadazandusun.
Minoboros Madius do subjek Kadazandusun nogi siniliu do boros ‘elektif’ montok susumikul kabansaan id Universiti Malaysia Sabah (UMS).
Id ahal dilo, kaakun isio miampai iso mantad manahak boboroson poimbida id sominar dilo, Fidelis Sipangkui, hinonggo id boros disio mokianu ‘akreditasi profesional’ montok mongingia Boros Kadazandusun.
“Iti kapanahak doti lobi ogumu kowosian kumaa mongingia ngawi,” ka disio.
Unsubon nogi di Madius o mongingia ngawi boros Kadazandusun montok monurat lobi potilombus kokomoi ‘subjek’ om okon mositi do id okitonan panaapan nga momoguno do ‘platform’ id kopoluyungan miagal ‘blog’.
Ka disio, ilo kapatantu doti lobi ogumu bakaang boros dilo montok diolo ih muhang balajar toiko momosnoi do ponoriukan kokomoi ahal dilo.
Id sominar dilo, walu mononoriuk boros Kadazandusun toiko onu ih rinait Bolongkitas pinapababai do karatas karaja diolo, ilo nopo nga ih Benedict Topin, Raymond Majumah, Rusinah Sinteh, Lina Bagu, Satiamah Sahat, George, Dr Rosliah om Fidelis.
Okitonan ih Madius osuau monokirumoh miampai susumikul kalapas sominar dilo.