Musa: Porinta minggisom moningolig nasib rayat
# Idsuang kaganaan balajaran, poniagaan, kabaalan, kinoiyonon posorili om susuai poh
SANDAKAN: Porinta maya do Tinimungan
Yayasan Sabah toririmo minggisom monulung om moningolig nasib rayat id suang mogisusuai kaganaan.
Boyoon Montiri ih nogi Ponorikohon Tinan Poingigit Amanah Yayasan Sabah Tan Sri Musa Haji Aman minoboros do ilo kaamung noh popotounda rayat id suang kaganaan balajaran, poniagaan, kabaalan, kinoiyonon posorili om susuai poh.
Ka dau, sabaagi suntu, Longkod Kakamot Tinunturu ih nukaban id Keningau kaanu doti manahak pingludaan kumaa tanak ngawi okon noopo mantad watas labus kakadaian katapi nogi mantad pointongkop pogun.
“Iti nopo nga pialatan tokou maya Yayasan Sabah montok monulung tanak ngawi om nogi rayat Sabah.
“Ilo montok papatantu do pogun tokou kotilombus koburu om tanak ngawi nogi kiharo rontob balajaran di takawas,” ka dau ontok minanahak boboroson pinotimpuun do ‘Jerayawara Yayasan Sabah Bersama Rakyat’ id Dewan Serbaguna Libaran hiti konihab.
Minoboros ih Musa do maya do ‘jerayawara’ dilo nogi, kopogowit do agensi ngawi ih manahak do ‘temuduga’ poingukab suai ko timpu ‘Taklimat Kerjaya
Sabah International Convention Centre’ ih pinolombus di iso tinan nointutunan id suang pomorunan hospitaliti, Accor Group.
“Om kumaa tanak ngawi, posorohon ku tuh kada pomili karaja katapi minggisom kopio mooi do kalantoi idsuang kaganaan karaja,” ka dau.
Namot dilo, Potunud Yayasan Sabah Datuk Sapawi Haji Ahmad minoboros do tinimungan dilo nakaanu pinapaharo do mogisusuai laang mantad lumansan montok kotos balak miampai uminampai do kaganaan ngawi poniagaan suai montok mogowit ponimbanan tosonong kopio om kotundaan togirot montok rayat om pogun.
Ka disio, maya koposorou’an om pongunsuban Tan Sri Musa, laang dilo nakapanahak asil di tosonong sabap Tinimungan yayasan Sabah baino lobi ogirot miampai ‘portfolio’ poniagaan di lobi alaab om ponokotanda do kinangaian tosonong mantad sontoun doid sontoun.
“Ontok toun nakatalib noopo, kiginumu 13 tanak komponi om komponi misompuru nakapanahak do RM232.5riong dividen kuminaa poingigit saham ilo nopo nga Tinimungan Yayasan Sabah maya do Innoprise Corporation Sdn Bhd montok toun 2016 om 2017.
“Maya kinopohompitan id suang mogisusuai bogian om kountungan di naanu, tumilombus Tinimungan Yayasan Sabah minggisom papanau do abaabayan ngawi montok popoingkawas do kosonongon kopoposion rayat Malaysia id pogun diti,” ka disio.
Minongomi potilombus, minoboros isio do sundung pia aparagat id suang mogisusuai pomorunan toiko bogian, Tinimungan Yayasan Sabah minggisom montok momogompi om kapadtamangan nopo nga iso mantad momoyoon ponorinaan talun awakas id pogun diti.
Ka disio, miampai bogian ‘konsesi’ talun kilinaab 1 riong hektar, Tinimungan Yayasan Sabah pinopoobi do limo bogian kopomogompian om kapadtamangan sabaagi tungkusan montok sinakagon timpu rumikot.
“Bogian diti kaamung noh Lembangan Maliau, Lembah Danum, Imbak Kanyon, Sungai Taliwas om poingompus Pantai Silam. Maya laang diti, kaanu nogi Tinimungan Yayasan Sabah monoluod doid Totally Protected Areas (TPA) id pogun diti,” ka disio.
“Iman-imanon toiko gaab tototopot abaabayan ‘jerayawara’ dilo nopo nga montok manahak do kopoilaan kumaa tulun ngawi kokomoi do kosiwatan karaja ngawi ih haro maya do koponguhanan mogisusuai kawo abaabayan, manahak kopointalangan kumaa tulun ngawi songokoiyonon kokomoi do kosiwatan ngawi id suang kaganaan kopongindapuan, manahak liwang kumaa momuruan montok mogiboboros miampai tulun ngawi songkoiyonon, popogirot do pisompuruan id pialatan rayat maya koponguhanan mogisusuai kawo abaabayan miampai misompuru, manahak do kopoilaan kikompitan abaabayan kotundaan porinta kumaa rayat, om popogirot do pisokodungan id pialatan koupisan om agensi koporintaan pogun om Pisompuruan.
Pialatan kaparagatan di pinaharo kaamung noh ‘temuduga’ poingukab torinaon Koupisan Winakas Karaja, pomiran kopongindapuan mantad ‘Teraju’ om pomiran mantad agensi ngawi miagal Mara, AIM, Yayasan Usaha Maju om agensi porinta om tinan okon porinta.
Nakaharo nogi ‘Taklimat Kerjaya Sabah International Convention Centre’.
Nokotindapou nogi id abaabayan dilo nga Monunurat Koporintaan Pogun Sabah Tan Sri Sukarti Wakiman, Monunurat Pisompuruan Pogun Sabah Datuk Nor Rizan Mohd Thani, Panakadai Montiri Koporintaan Kinoiyonon om Pomulaminan Pogun Datuk Zakaria Haji Mohd Edris om Presiden MPS Datuk James Wong.