Ilagon pongindaraatan sangod
# JR Plus pokionuon ‘mindahu gana’ minsomok rayat
BEAUFORT: Pokionuon di Exco Kopoilaan Umno Sabah Datuk Sapawi Ahmad o puru parti doulu noh ‘Jentera Jalinan Rakyat Plus’ (JR Plus) Barisan Nasional (BN) montok lobi aparagat ‘mindahu gana’ montok minsomok rayat id bogian gamut sakot.
Isio ih nogi Boyoon Bogian Umno Sipitang minoboros do kopoinsomokan dilo kotumboyo okon noopo montok manalasai do kobolingkangan om kogunoon rayat, nga kaanu nogi mongilag pongindaraatan ih pongimbarasan ngawi do bogian ih aiso tonggungan kumaa porinta.
“Muhang oku JK Plus minggisom kumaraja om noponu sunduan om nogi monulung manalasai do nunu noopo kobolingkangan kaamung noh kogunoon rayat id koiyonon.
“Tonggungan dikoyu (JR Plus) kumaa rayat kapanahak nogi kotumbayanan kumaa pongundi montok tumilombus monokodung porinta posodia haro montok mamajamin kotundaan di potilombus,” ka disio.
Noboros disio ahal dilo ontok romuto do monunurat abar kalapas pinotimpuun do Sominar Papawakas Kopomuruanan Koonduan om Kopogunan id Sikul Kabansaan (SK) Kakadaian Beaufort di tadau Minggu.
Nokotindapou nogi id abaabayan dilo nga Manakadai Montiri Ponombuluian, Koubasanan om Kinoiyonon Posorili Datuk Kamarlin Ombi, Boyoon Koonduan Umno Sipitang Datuk Surinam Sadikun om Boyoon Komulakan Umno Sipitang Yamani Hafez Musa.
Id suang ahal dilo, Sapawi ih nogi Puru Parlimen Sipitang minamarayou nogi koulalahon ginawo Luguan Montiri Datuk Seri Najib Razak ih toririmo kopuriman om kikosianan kokomoi kogunoon rayat id pogun diti.
Ka disio, Najib nopo nga songulun momuruan di ogumu minogowit ponimbanan id Malaysia piagalon Luguan Montiri gulu poh ih nokoumbal minomuruan pogun solinaid 22 toun.
Ka disio, porinta ih pinorinta BN ogumu minogowit kotundaan doulu noh id labus kakadaian doulu noh id Sabah om Sarawak otopot kopio pinopokito do kopomuruanan Najib nopo nga ih tosonong kopio.
“Ogumu kotundaan om koburuon di pininggisoman Luguan Montiri (Najib) tokou idsuang timpu di oniba. Maya kikosianan om koinsamadan dau, rayat Sabah om Sarawak nakaanu kotundaan infrastruktur maya do pamansaian Talun Alun Tagayo Pan Borneo.
“Ogumu kagu koburuon di nowit do porinta nga montok papatantu do kotundaan kapanau miampai tososonong nopo nga kangaam kopio montok rayat id pogun diti tumilombus manahak kotumbayanan kumaa BN,” ka disio.