Walu kusai noilaan panagi dadah tinaan AADK
KENINGAU: Walu tulun kusai tinaan di Agensi Anti Dadah Kabansaan (AADK) watas diti sabap kikotumbayaan do nokoompit id panagian dadah, hiti konihab.
Koinsanai suspek tinaan id lamin tiyonon sompori-pori id Sook, ka di Upisor AADK Azry Golbin @Azmi.
Ka dau, pinapanau karaja ih nopupusan id jam 1 minsusuab dilo nakaanu minanaan suspek ih kiumur id bindurugan 30 gisom 40 toun.
Isio ih nogi boyoon ‘operasi’ dilo minoboros do kinagakaman ih winonsoi nopo nga tumanud do kopoilaan om pinonoinuan solinaid sominggu id duwo kakampungan id Sook.
“Koinsanai tinaan tumanud Seksyen 3(1) Akta Panagih Dadah Pongubatan om Pomolingosan 1983 sabap ‘positif dadah’ kawo methamphetamine (syabu).
“Bogian mogigion mositi toririmo koilo kokomoi koulalahon ginawo om nogi kinosimbanan tinan tangaanak mooi do kobolingkangan panagihan dadah diti kaanu momunso id bogian timpuunon poh pogului koyuon maid-laid oindamaan koinggorit,” ka dau.
Suai ko ilo ka dau, kaparagatan toiko abaabayan pomunsoan mositi onjuron di tinimungan sompori-pori sabaagi laang pomunsoan tosisikap om popointalang do tulun ngawi kokomoi do waya undangundang sokiro ko koompit miampai kobolingkangan dilo.
Minoboros Azry do koinsanai diolo ih nataan pinonguwungan solinaid walu tadau di Kuut majistret hiti montok tujuan ponoriukan id Longkod Panahanan Reman Papar (PTR) tumimpuun mantad konihab.