Bot susumakai mogohimu mogovit humabus tong gas tinaan APMM
TAWAU: Agensi Popogiotkuasa Maritim Malaysia (Maritim Malaysia), Uvang Maritim 18 Tawau id ‘Ops Pluto Timur’ minanaan iso bot susumakai kuminam mogohimu mogovit humabus tong gas LPG id kavaigan Tawau kiikila jam 8.30 dongotuvong.
Kumoduvo Potunud Operasi Komander Maritim Mohd Yusri Hussin minoboos do bot mimpanau Maritim Malaysia ontok minonoodo pimpanaan nokopomolisa bot dino om nokoiho tong gas LPG pinosuvang id suang bot.
Pinomolisaan potihombus nokoiho do 30 tong gas LPG (Petronas), injin potozidon Yamaha 85 kuasa kuda om songuhun juragan tuhun Indonesia kiumul 31 toun kivaa id suang bot dino.
“Bot kaamung koinsanai tong gas LPG ih kihoogo hobi kuang RM27,000 dino tinaan om novit suminuvang doid jeti APMM/PPM montok haang potihombus,” ka disido.
Kes soizukon tumanud Seksyen 21, Akta Kawalan Bekalan 1961, ih nung katantu kahasaan obuli ontokon ukuman danda au kohobi do RM1 lizong toi tolungku au kohobi tohu toun, toi goduvo-duvo ukuman dino.
Tumanud disido, Uvang Maritim 18 Tawau tumihombus popoingkavas vagu pimpanaan om popogiotkuasa id boogizan tonggungan montok papatantu do kadandang undang-undang kaanu mongipop om kuangon id kavaigan Malaysia hoohobi id Tawau.
Pokionuon nogi di Yusri o tuhun togumu montok mikunsi onu noopo kopoihaan kokomoi kadandang do undangundang doid boogizan Maritim Malaysia. Onu noopo sogu om kopoihaan obuli pataakon mozo numbul ‘hotline’ 089-752115 toi maza MERS 999.