Misompuru popotounda Sabah: Musa

KOTA KINABALU: Kopinamot pangaramitan Toun Wagu Sina ontok toun diti, alansan kopio ih Boyoon Montiri Tan Sri Musa Aman kumaa toinsanan momuruan tuh miiso montok popotounda Sabah.

“Otumbayaan oku miampai aharo nopo pisompuruan di togirot diti, toinsanan momuruan asanang doti momorinta pogun diti doulu noh koporintaan Barisan Nasional (BN).

“Ontok baino diti, okito tokou rayat mogisusuai tinaru uminampai nogi tuminindapou abaabayan lamin poingukab diti om otumbayaan tokou sunduan pisompuruan om kosompuruan kotilombus kotimporon.

“Alansan oku nogi do kopinamot Toun Wagu Sina diti, tumilombus tokou misompuru montok popotounda Pogun Sabah,” ka dau.

Noboros disio ahal dilo ontok tuminindapou Abaabayan Lamin Poingukab Parti Bersatu Sabah (PBS) id Dewan Hakka, Teluk Likas, hiti di tadau Koonom.

Kinorikotan disio rinamit di Kumoduo Boyoon Montiri Tan Sri Joseph Pairin Kitingan, Pemangku Presiden PBS Datuk Seri Panglima Dr Maximus J Ongkili, Kumoduo Presiden Datuk Dr Yee Moh Chai, Naib Presiden Datuk Ir Edward Yong Oui Fah om puru Tinan Takawas PBS.

Kiikira 5,000 tulun mogisusuai tinaru posorili Kakadaian Tagayo Kota Kinabalu tuminindapou abaabayan ih tuminimpuun jam 9 kosuabon dilo.

Tombului ngawi pinotorungak miampai taakanan koubasanan om piipiro pokitonan sayau singa om sinding mantad artis kinoiyonon.

Nokotindapou nogi ih sawo Boyoon Montiri, Puan Sri Faridah Tussin, Montiri id Koupisan Luguan Montiri Datuk Seri Panglima Abdul Rahman Dahlan, Montiri Sains, Teknologi om Inovasi Datuk Seri Panglima Madius Tangau, Montiri Karaja-Karaja Poimbida Datuk Seri Panglima Teo Chee Kang, Montiri Kotundaan rayat om Ahal Momoguno Datuk Jainab Ahmad Ayid, Mayor Bandaraya Kota Kinabalu Datuk Yeo Boon Hai om Konsul Jeneral Pogun China id Sabah Liang Caide.

Musa om Faridah minokigambar kaandaman songowian ngawi puru Tinan Takawas PBS.

Pairin (gibang) ruminamit kinorikotan Musa (wanan) id Abaabayan Lamin Poingukab PBS id natad Dewan Hakka, Teluk Likas.

Musa om Faridah om nalapan ngawi poimbida id abaabayan ‘Yee Sang’.

Musa osuau monokirumoh om mogitatabi miamapi tulun ngawi di nokotindapou.

Sawo Kumoduo Porosiden PBS Datin Vicky Lai Nyat Yin (wanan) pinapatahak do paket angpau kumaa songulun mantad nokotindapou tulun nokolohing noh mikuo intongan di Yee (gibang), maximus (tanga) om Pairin (duwo wanan).

Musa om Faridah minokigambar songowian ngawi Madius (gibang), Pairin (duwo gibang) Yee (poingkakat gibang), Vicky (poingkakat wanan) om Maximus (wanan).