‘Karnival’ Dagang Nigitan Rayat id Kota Belud aramai kopio
KOTA BELUD: Abaabayan Tagayo Dagang Nigitan Rayat hiti, nakapanau aramai kopio miampai kinorikotan kiikira 3,000 tulun ih minaganu kosiwatan minomoli barang kogunoon miagal wagas, tumau pagansak, tapung om gula miampai gatang omurah.
Abaabayan (karnival) sangadau tuminimpuun jam 8 kosuabon gisom 2 sosodopon dilo nopo nga pinanjur do Barisan Nasional (BN) Kota Belud miampai pinitambaan Tinan Pamadagangan Pomutanaman Pisompuruan Sabah, Tinan Koburuon Sada Malaysia Sabah om mamaamajak kinoiyonon.
Mongindapu GiatMara mantad watas diti nogi uminampai do abaabayan dilo montok papadagang do asil kakamot kapalabusan om kotorinaan diolo, om nogi mogiwowoyo ngawi pinapalantoi do ‘karnival’ dilo.
Songulun tombului nokotindapou id abaabayan dilo, Hairi Asul, 42, minoboros do abaabayan dilo kaanu monulung mongingkudi do balanja kopoposion momoguno sabap kogunoon ih pinosodia id abaabayan dilo kangaam kopio om lobi omurah piagalon id kapangadagangan.
“Karnival diti nogi kaanu poposoribau do koulalahon monorini kumaa tulun ngawi,” ka di Hariri ih ponogi songulun mongingia, ontok romuto Bernama id abaabayan dilo, konihab.
Songulun kagu tombului nokotindapou, Mohd Nazarudin Rashkin, 42, nopo nga alansan kopio tuh kapanganjuran iral dilo potilombuson ontok timpu tabantalan montok monulung lobi ogumu rayat id labus kakadaian momoli barang kogunoon miampai gatang omurah.
Suai mantad barang nokoring, pinoposodia nogi ‘karnival’ dilo do barang noyopos miagal manuk, sada om kinotuan ngawi ih padagangon miampai gatang omuurah.
Montiri Komunikasi om Multimedia Datuk Seri Dr Salleh Said Keruak pinopoobi nogi timpu minoi intong karnival dilo di kosuabon konihab. -Bernama