Otumboyo BN kaanu popotimporon tirikohon Nabawan : Madius
NABAWAN: Au obuli Upko asantaban ginawo nga mositi tumilombus minggisom kumaraja montok papatantu do parti dilo koponulung Barisan Nasional (BN) popotimporon do tirikohon Lamin Koundangan Pogun Pogun (DUN) Nabawan id Pomilian Tagayo Ginumuan Ko-14 (PRU14).
Ponowoli naamot Porosiden Upko Datuk Seri Madius Tangau minoboros do mositi nogi Upko papatantu do gaab montok misokodung poimponu miampai pironitan dilo mooi BN kamanang toinsanan tirikohon, kaamung noh Nabawan id Parlimen Pensiangan.
“Kada paganu asanang pomilian timpu rumikot (sundung pia ponokotanda osonong) au tokou obuli asantaban ginawo.
“Mositi tumilombus tokou kumaraja sabap muhang tokou kamanang,” ka disio ontok pinotimpuun do abaabayan piombalutan injin pomilian tagayo Upko Nabawan id Kalab Dewan Belia, hiti.
Madius ih nogi Montiri Sains, Teknologi om Inovasi minoboros do miampai pomilian tagayo ih maid-laid minsomok, aiso duwo ralan kokomoi disio nga toinsanan tulun mositi minggisom poimponu.
“Onu ih pokigunoon tokou nopo nga puru di tosonong kopio, mositi ilagon tokou iyolo ih haro kopuruan ‘multiparti’,” ka disio.
Minoboros isio do ontok pomilian tagayo di nakatalib, Upko haro kopuruan nokorijisto kiikira 6,000 mantad 12,900 pongundi nokorijisto hiti nga kalapas kinapatantuan tohuri noh pinosunud, poingigit Datuk Bobbey Ah Fang Suan nakaanu 3,816 undi noopo.
Nakamanang ih Bobey miampai ‘majoriti 342 undi noopo suminaap PKR ih nakaanu 3,474 undi om Star om calon Bebas nakaanu 351 undi.
Madiud ih nogi Puru Parlimen Tuaran minoboros do pisokodungan kitimungan pialatan toinsanan parti pikoruhangan BN hiti nopo nga kiguno kopio.
“Au tokou obuli kamanang sondiri, agayo kamanangan tokou katapi haro pisokodungan tokou di tagaras miampai parti pikoruhangan suai,” ka disio mikuo minanambaa do Upko mositi papaharo piromutan di lobi tosonong miampai toinsanan pikoruhangan BN.
Minoboros isio do injin parti mositi lumintuhun id suriba om papatarang kumaa ‘gamut sakot’ kokomoi do ralan tonudon porinta om abaabayan kotundaan diolo montok rayat.
Tumanud dau, injin dilo mositi papatarang kopurimanan kokomoi Nabawan kalapas nokotoguang ponimbanan di kobilangan kopio.
“Nga kopoilaan ngawi diti pinusing ngawi di gugumaga, om ‘gamut sakot’ mositi onuan kopoilaan di tototopot kokomoi do ahal dilo,” ka dau.
Otumbayaan ih Madius do miampai sunduan Upko baino diti, agayo kamanangan BN hiti.
Nokotindapou nogi id abaabayan dilo nga Potunud Pomilian Upko Tan Sri Wences Anggang, Boyoon Upko Pensiangan Datuk Bobbey Ah Fang Suan, puru ngawi tangakawas om momuruan Upko Nabawan.