Apantod manangod ‘sindiket’
# Mongipop pamadagangan kad kointutunan pilasu
KOTA KINABALU: Kinosuangon pakaraja songkosuaian mantad pogun timbang ih poingoros kopio pialatan natadon Sabah nosiliu longkod ‘sindiket’ pamadagangan kad kointutunan pilasu.
Kumoduo Luguan Montiri Datuk Seri Dr. Ahmad Zahid Hamidi minoboros do laang popogirot ralan longobon sumuang om lumabus id sawat pialatan apantod montok mongorulan ahal dilo.
Tumanud dau, Komontirian Suang Pogun (KDN) maya Koupisan Koporijistaran Pogun (JPN) om Koupisan Imigresen aparagat papanau do ponoriukan.
“Piipiro kinagakaman nakapanau noh om ponoriukan nogi papanaon montok pulis mongukab karatas ponoriukan kokomoi do haro o laang papadagang kad kointutunan pilasu diti.
“Gisom baino diti aiso poh kinagakaman winonsoi id pogun ngawi suai, nga kopongintongan potilombus toririmo wonsoyon di Unit Popogirotkuasa JPN mooi do bogian koompit au koidu,” ka dau.
Noboros disio ahal dilo kuminaa monunurat abar kalapas tuminanud timpu Taklimat Koposodiaan Pomilian Tagayo Ginumuan (PRU) Ko14 montok Pulis Diraja Malaysia (PDRM) id Longkod Upis Pulis Kontinjen (IPK) Sabah konihab. Nokotindapou nogi ih Boyoon Montiri Sabah Tan Sri Musa Haji Aman.
Zahid ih nogi Montiri Suang Pogun minonuhu nogi Boyoon Potunud Imigresen mooi manahak karaja kumaa upisor montok momonsoi kopongilaan miamapi pagarawatan id longobon sumuang om lumabus id sawat.
Laang dino nokomoi ka dau, montok mongilo mantad bogian tosikap do ginuno nangku kad kointutunan pilasu toiko tototopot.
Idsuang ahal dilo, muhang o bogian dau tuh kapagnu laang tosikap montok poposodia do poruntukan montok monginsonong lamin ngawi tiyonon pulis id pogun diti. Ka dau, laang dino nokomoi montok mintamong kotundunan puru pulis montok koinsasanai miagal nogi ih pinapanau id pogun ngawi suai.