Ingat-ingaton ahal tiwou tinaru
# Koposorohon di Musa kumaa rayat mooi au oimbayatan, ompuong miampai laang tinan di aiso tonggungan
KOTA KINABALU: Pokionuon o rayat tuh au oimbayatan toiko ompuong miampai laang ngawi tinan di aiso tonggungan ih kuminam momoguno do tiwou pitinaruan om agama id pogun diti.
Minoboros ih Boyoon Montiri Tan Sri Musa Haji Aman do gisom baino, kakaal haro tinan pointantu ih kuminam momoguno do ahal au osonong irad dilo montok momiraag kolumaagan agama pialatan rayat.
“Ahal diti sabap, koilo tokou do kiguno kopio misompuru gumirot om mogisosokodung, om nogi agama sondiri nga au kapangantob dotokoo montok mamantang ngawi kaadatadaton om koubasanan om nogi kotumbayanan iso om nogi suai.
“Mantad dilo, mositi koilo tokou do tinan aiso tonggungan diti kuminam mimboros au otopot noopo, mamajanji au otopot om mangapui-apui do tiwou pitinaruan om agama di aiso id Sabah solinaid diti,” ka dau ontok pinotimpuun do ‘Majlis Multaqa Murabbi Ummah’ bogian pogun, hiti konihab.
Namot dilo, minoboros ih Musa do toririmo porinta kosokodung om mamagatang do tonggungan, toluod om ‘komitmen’ takawas mongingira ngawi agama id pogun diti.
Ka dau, mongingia agama papanau do tonggungan kiguno montok papatantu do tangaanak ngawi tomulok onuan do toilalaan agama montok poposoribau do tulun kiguno di tosonong kopio.
Suai ko ilo ka dau, ilo koponoluod nogi doid kotundaan pogun om kolumaagan om kotoonongan rayat mogisusuai tinaru, agama om kaadatadaton id pogun diti.
Minoboros isio do pinitimungan di notindapou lobi 1,000 mongingia agama dilo kapanahak asil montok popoingkawas do toilalaan, ilimu, om winakas montok pisaan om kotundaan id pogun diti.
Ka dau, piombalutan togirot agama pokigunoon kopio hinonggo, iyolo okon noopo kitonggungan momuruan om monimban do ilimu, koubasanan om koulalahon ih nawayaan do ‘Allah SWT’.
Nakaharo nogi id abaabayan dilo nga kapanahakan poruntukan okitonan ‘replika cek’ mantad koporintaan Psiompuruan om poruntukan ‘One Off’ kuminaa imam, bilal, siak, mongingia takmir om mongingia Kafa.
Nokotindapou nogi ih Kumoduo Montiri id Koupisan Luguan Montiri Senator Datuk Dr Asyraf Wajdi Dusuki om Panakadai Montiri doid Boyoon Montiri ih ponogi Ponorikohon Tinan Agama Silam Sabah (Muis) Datuk Mohd Arifin Mohd Arif.